Սպառողական վարկ, վարկային գիծ, օվերդրաֆտ, հիփոթեք  և այլն․ սրանք բոլորը վարկատեսակներ են, որոնք թեև բնույթով նման են, սակայն  ունեն բազմաթիվ տարբերություններ։ Այս անգամ մեր բլոգում առանձնացրել ենք ֆիզիկական անձանց համար նախատեսված վարկերն ու նրա տեսակները, կարևոր եզրույթները, որ լրացուցիչ ֆինանսներ ներգրավելու անհրաժեշտության դեպքում ֆինանսական բառարան ունենաս ձեռքի տակ ու հստակ իմանաս՝ որ վարկատեսակն է քեզ պետք: 

Ինչպես խնայողությունների բառարանում, այս անգամ ևս բառերն այբբենական կարգով չենք դասավորել, այլ խմբավորել ենք դրանք` ըստ օգտակարության, անհրաժեշտության և ըստ քո կարիքների։ 
 

Վարկային պատմություն

Վարկ ստանալու համար կարևորագույն նախապայման է վարկային լավ պատմությունը։ Քո վարկային պատմություն սկսում է ձևավորվել այն պահին, երբ առաջին անգամ վարկ ստանալու ակնկալիքով դիմում ես որևէ ֆինանսական հաստատություն։ Սա մի մեծ շտեմարան է քո մասին, որի նպատակն է օգնել բանկին կամ վարկային կազմակերպությանը տրամադրել կամ մերժել վարկը։

 Վարկային պատմությունը ցույց է տալիս, թե ինչպես ես կատարել և շարունակում կատարել քո բոլոր ֆինանսական պարտավորությունները: Այն պարունակում է տեղեկություն քո ստացած վարկերի, դրանց քանակի և գումարի, յուրաքանչյուր վարկի տեսակի և ժամկետների մասին։ Վարկային պատմության մեջ արտացոլվում է, թե ինչպես ես սպասարկել քո վարկը,  օրինակ, արդյո՞ք ժամանակին ես կատարել մարումները, թե ոչ: Այս բաժնում արտացոլվում է նաև այլ մարդկանց տրամադրված երաշխավորությունները, ժամկետանց վարկերի առկայությունը, վերջին վեց ամսում աշխատավարձի միջին չափը, նույնիսկ՝ վճարած ու չվճարած կոմունալները։
 

Ինչպես ունենալ վարկային լավ պատմություն

Վարկային լավ պատմություն ունենալու համար հեծանիվ հորինել պետք չէ, պարզապես պետք է պարտաճանաչ կատարել վճարումներն ու լավ մտածել այլ մարդկանց երաշխավորելուց առաջ։ Ի դեպ, վարկային պատմության մեջ ներառվում են միայն հարցմանը նախորդող 5 տարվա վերաբերյալ տվյալները: Քո վարկային պատմությունից է կախված քո հետագա վարկունակությունը, որը կօգնի ունենալ վարկային «սպիտակ» գիծ։

Ի դեպ, եթե վստահ չես, թե ինչ գույն ունի քո վարկային պատմությունը, կարող ես ԱՔՌԱ վարկային բյուրոյից տարին մեկ անգամ անվճար ստանալ այդ մասին զեկույց։
 

Սպառողական վարկ

Չնախատեսված անձնական և ընտանեկան ծախսերի դեպքում սպառողական վարկը քեզ անհրաժեշտ լուծումն է: Այս վարկատեսակը քեզ հարմար է, եթե ստացած գումարը նախատեսում ես ծախսել կանխիկ տարբերակով, քանի որ կանխիկացման վճար չի ենթադրում, իսկ մարումները կարող ես կատարել ամսական  կտրվածքով: Ի դեպ, վարկային հայտն Ամերիաբանկում օնլայն ներկայացնելու դեպքում հայտի պատասխանը կստանաս անմիջապես՝ մինչև 5 րոպեի ընթացքում:
 

Վարկային գիծ

Եթե չպլանավորված գնումների սիրահար ես, վարկային գիծը հենց այն է, ինչ քեզ պետք է։ Դա բանկի կողմից քեզ տրամադրվող վարկային միջոցներ են, որոնք հասանելի են կրեդիտային քարտով: Վարկային գիծը հարմար լուծում է անկանխիկ գնումների համար, որը նաև մի շարք առավելություններից օգտվելու հնարավորություն է տալիս։ Վերջիններս, իհարկե, բանկից կամ վարկային կազմակերպությունից կախված կարող են տարբերվել, սակայն հիմնականում առաջարկում են արտոնյալ ժամանակահատված գումարն անտոկոս վերադարձնելու հնարավորությամբ, տոկոսագումարի հաշվարկ միայն ծախսված գումարի համար, գումար աշխատավարձի մի քանի պատիկի չափով և այլն։ Ամերիաբանկի կողմից առաջարկվող վարկային գծի առավելությունների մասին՝ այստեղ։
 

Օվերդրաֆտ

Այս վարկատեսակը շատ նման է վարկային գծին, սակայն ի տարբերություն վերջինիս, գումարը կարող ես ծախսել կանխիկ կամ անկանխիկ, ինչպես հարմար է քեզ։ Տոկոսագումարը կրկին հաշվարկվում է միայն ծախսված գումարի նկատմամբ։ Ամերիաբանկում այս վարկատեսակը տրամադրվում է աշխատավարձի մինչև քառապատիկի չափով։ Այլ մանրամասները՝ այստեղ։
 

Վարկային սահմանաչափ

Վարկային սահմանաչափը քեզ համար է, եթե արագ գումար է պետք, սակայն դեռ համոզված չես, թե որքան գումար է քեզ անհրաժեշտ լինելու։ Դու կարող ես  անշարժ գույքի լիկվիդային արժեքի և վարկունակության ցուցանիշների հիման վրա ստանալ հաստատված սահմանաչափ, որի ներքո կարող ես ստանալ վարկ, վարկային գիծ և օվերդրաֆտ՝ առանց հետագա լրացուցիչ ուսումնասիրության:
 

Վարկային հաշվիչ

Անունը, իհարկե, ամեն ինչ ասում է․ վարկային հաշվիչի օգնությամբ կարող ես հաշվել, թե  որքան գումար ես վճարելու ամեն ամիս։ Պարզապես պետք է մուտքագրել վարկի վերաբերյալ բոլոր տվյալներն ու մի քանի րոպեում տեսնել ամսական մարումների, վճարման ենթակա գումարի ու ընդհանուր տոկոսագումարի չափը։  

Ինչպես և խոստացել ենք, մեր բառարանը դեռ շատ բաժիններ կունենա, և անհատների համար նախատեսված մյուս վարկատեսակներին՝ հիփոթեք, ավտովարկ և այլն, ինչպես նաև բիզնեսներին առաջարկվող վարկերին ու ֆինանսավորման գործիքներին  կանդրադառնանք հաջորդիվ։