Սեփական բիզնես ունենալու գաղափարը գայթակղիչ է և, իհարկե, ճիշտ սկսելու դեպքում կարող է լինել նաև արդյունավետ և հետաքրքիր:

Բայց այստեղ մի բայց կա: Այն ունի մարտահրավերների իր արդար բաժինը: Բիզնես սկսելու և զարգացնելու գործում հաջողելու համար, բացի բիզնես գաղափարից, որպես ձեռնարկատեր քեզ անհրաժեշտ են տարբեր հմտություններ և ռեսուրսներ։ Սա ենթադրում է ոչ միայն ֆինանսական ներդրումներ, այլև մտավոր աշխատանք:

Քո բիզնեսի համար ամուր հիմքեր ստեղծելու ճանապարհին մենք շարունակում ենք ուղեկցել քեզ։

Այս անգամ առանձնացրել ենք մի քանի հիմնական ուղղություն և խորհուրդ ենք տալիս քեզ այդ ուղղություններով ձեռք բերել առնվազն բազային գիտելիքներ:   
 

• Հաշվապահություն և ֆինանսների կառավարում

Ֆինանսական գրագիտությունը առանցքային է քո բիզնեսի համար: Սա ներառում է հաշվապահական հիմնական սկզբունքների ըմբռնում, ինչպիսիք են՝ եկամուտը, շահույթը և վնասը, դրամական միջոցների հոսքերը և հաշվեկշիռները: Պետք է գոնե նվազագույն պատկերացում ունենալ հաշիվ-ապրանքագրերի և աշխատավարձերի կառավարման մասին: Չմոռանաս հարկերի մասին:

• Իրավական դաշտ

Յուրաքանչյուր բիզնես գործում է տեղական և միջազգային օրենքների շրջանակներում: Համոզվիր, որ տիրապետում ես քո բիզնեսը կանոնակարգող համապատասխան իրավական կառուցվածքին:

• Մարքեթինգ և բրենդինգ

Սոցիալական մեդիայում ներկայությունից մինչև որոնման համակարգի օպտիմալացում (SEO) և ավանդական գովազդ․ ժամանակակից մարքեթինգային ռազմավարություններին տիրապետելը կարևոր է: Մարքեթինգային և բրենդինգի ամուր ռազմավարությունը կօգնի քո բիզնեսին աչքի ընկնել մրցակցային շուկայում: Այս ուղղությամբ ունենք բլոգ, որը կարող է այս առումով լավ մեկնարկ լինել քեզ համար:

• Նախագծի կառավարում (Project Management)

Ցանկացած բիզնես նախագիծ է՝ գործողությունների ամբողջություն, որն ուղղված է որևէ հստակ նպատակի իրականացմանը, և այն իրականացնելու համար անհրաժեշտ է տրամադրել որոշակի ժամանակ և ռեսուրսներ։ Նախքան քայլ կատարելը, դու պետք է կանխատեսես բոլոր հնարավոր հետևանքները, ինչի համար կարևոր է չանտեսել այս հմտության զարգացումը:

• Մարդկային ռեսուրսներ (HR)

Անկախ բիզնեսի մեծությունից` մարդկային ռեսուրսների մասին հիմնական պատկերացում ունենալն առանցքային է: Սա ներառում է ինչպես աշխատուժի կառավարում, այնպես էլ դրական աշխատանքային մշակույթի ձևավորում: Աշխատակիցները բիզնեսի ողնաշարն են, ուստի ներդրումներ կատարելը նրանց աճի և աշխատանքային լավ միջավայրի պահպանման համար կտա իր պտուղները, այն էլ շատ արագ:  

• Հաճախորդների հետ հարաբերություններ և վաճառք

Եկամուտ և հավատարիմ հաճախորդների բազա ստեղծելու համար կարևոր է հասկանալ վաճառքի գործընթացը և հաճախորդների հետ հարաբերություններ զարգացումը: Հաճախորդների հետադարձ կապը, աջակցության ծառայությունները և հաճախորդների հետ հարաբերությունների կառավարման (CRM) ամուր համակարգը կօգնի ունենալ ներգրավված և բավարարվված լսարան:

• Տեխնոլոգիա և թվային գործիքներ

Այն մասին, թե թվային փոխակերպումը ինչպես է իր կանոնները թելադրում ցանկացած ոլորտում, առաջին անգամը չէ, որ խոսում ենք: Բիզնեսի թե' առաջին քայլերի, թե' զարգացման սահուն ընթացքն ապահովելու համար կարևոր է քայլել  տեխնոլոգիական զարգացմանը համընթաց: Առաջարկում ենք կարդալ մեր բլոգը այն գործիքների մասին, որոնք թվայնացման այս դարաշրջանում կօգնեն քո բիզնեսին մրցունակ դիրք ամրապնդել շուկայում։

• Ռիսկերի կառավարում

Յուրաքանչյուր բիզնես պետք է կառավարի իր ռիսկերը՝ ֆինանսական, գործառնական թե շուկայի հետ կապված: Ռիսկերի կառավարման արդյունավետ ռազմավարություն ունենալն օգնում է միշտ պատրաստ լինել ցանկացած պատահարի ու արագ արձագանքել դրանց՝ մեղմելու կամ չեզոքացնելու հնարավոր բացասական հետևանքները:

Այս ամենը սկզբում կարող է ճնշող թվալ, բայց այս ոլորտներում հիմնական գիտելիքներ ձեռք բերելը հնարավորություն կտա տեղեկացված որոշումներ կայացնելու և երկարաժամկետում հաջողության հասնելու համար: Անհրաժեշտության դեպքում մի՛ հապաղիր դիմել մասնագետների օգնությանն այն ոլորտներում, որտեղ ավելի քիչ ես քեզ վստահ զգում: Եվ դե իհարկե, շարունակիր կարդալ մեր բլոգը։