Բիզնես սկսելը միշտ ոգևորիչ է: Դու վերջապես ունես քե սեփականը, մոտիվացված ես ու անում ես առավելագույնը, որ այն հաջողի (երբեմն առանց քեզ խնայելու): Իսկ ի՞նչ է սովորաբար հաջորդում այս ոգևորությանը. անքուն գիշերներ, անվերջ թվեր, զանգեր և օրեր, երբ անգամ սուրճը չի փրկում։
Գալիս է մի պահ, երբ զգում ես՝ այլևս ուժ չունես։ Ոչ թե որովհետև գործը դժվար է, այլ որովհետև «վառվել» ես․  հոգնել ես մշտական սթրեսից, որոշումներ կայացնելուց և պատասխանատվությունից։ Իսկ բիզնեսդ, որը մի ժամանակ ոգեշնչման աղբյուր էր, դարձել է բեռ։

Հենց այսպես է սկսվում հուզական այրումը կամ burnout-ը։ Այսօր Ամերիա բլոգում պարզելու են` ինչպես կանխել այն, որ դու միշտ մոտիվացված և արդյունավետ լինես:

Ի՞նչ է հուզական այրումը կամ burnout-ը

Հուզական այրումը ոչ թե պարզապես հոգնածություն է, այլ լուրջ հոգեկան և ֆիզիկական հյուծում։ Երբ անընդհատ գործի մեջ ես, միշտ խնդիրներ ես լուծում և մոռանում ես հանգստի մասին, ուղեղդ մի օր ասում է. «Բավական է, ես էլ չեմ կարող»։
Հենց այդ պահին էլ սկսվում է`
-    Մշտական թուլություն ու հոգնածություն
-    Դժգոհություն սեփական գործից
-    Կենտրոնանալու դժվարություն
-    Մոտիվացիայի կորուստ
-    Քնի խանգարումներ 
-    Լարվածություն ընտանեկան և այլ հարաբերություններում

Եթե այս ցուցակից գոնե երեք կետ քո մասին  է, ժամանակն է, որ լրջորեն մտածես հոգեկան ու ֆիզիկական առողջության վերականգնման մասին։

Հիշիր՝ բիզնեսը պետք է աճի քեզ հետ, ոչ թե քո հաշվին։

Ինչպե՞ս կանխել հուզական այրումը


1․ Գծիր հստակ սահմաններ

Ժամանակդ կառավարիր այնպես, որ աշխատանքը չխանգարի անձնական ու ընտանեկան կյանքին։ Փորձիր սահմանել հստակ ժամ, որից հետո այլևս գործնական նամակներ չես ուղարկելու կամ զանգերի չես պատասխանելու․ օրինակ՝ 19:00-ից հետո զբաղվիր միայն անձնական հարցերով։ 
Ի դեպ, ժամանակի կառավարման մասին ավելի մանրամասն պատմել ենք մեր նախորդ բլոգերից մեկում։ 

2․ Մի փորձիր լինել սուպերհերոս

Չի կարելի միաժամանակ լինել և´ հաշվապահ, և´ մարքեթոլոգ, և´ դիզայներ, և´ վաճառող։ Փորձիր պատվիրակել աշխատանքի մի մասը։ Սկզբում դա դժվար կթվա, բայց շուտով ինքդ քեզ շնորհակալ կլինես։ 

Բացի այդ, օգտվիր օնլայն հարթակներից, որոնք հնարավորություն են տալիս խնայել ժամանակդ։ Օրինակ` MyBusiness հարթակի միջոցով կարող ես մեկ պատուհանի սկզբունքով օգտվել բիզնեսիդ անհրաժեշտ ծառայություններից՝ առանց բանկ այցելելու։ Այսպես ամսական ու տարեկան կտրվածքով բավականին ժամանակ կխնայես ու կտրամադրես այն բիզնեսիդ երկարաժամկետ զարգացմանը կամ էլ հանգստիդ:

3․ Պլանավորիր հանգիստն այնպես, ինչպես պլանավորում ես գործնական հանդիպումները

Տարեկան առնվազն երկու անգամ լիարժեք հանգստացիր` առանց աշխատանքի, համակարգչի, հեռախոսի կամ էլ. փոստի ստուգման։ Երբ դու լիարժեք հանգստացած ես, ուղեղը կարողանում է վերամշակել ստացած տեղեկություններն ու գեներացնել թարմ գաղափարներ։