Սեպտեմբերն արդեն մոտենում է․ դպրոցներն ու բուհերը շուտով կլցվեն զրույցներով, ծիծաղով ու նոր նպատակներով։ Դու էլ երևի սպասում ես նոր ծրագրին, ուսուցիչներին/դասախոսներին ու դասընկերներին։ Նոր ուսումնական տարվա սկիզբը ոգևորիչ է, բայց նաև պատասխանատու և լի նոր մարտահրավերներով։
Որպեսզի տարին սկսես վստահությամբ ու լավ տրամադրությամբ, այսօր Ամերիա բլոգում կբացահայտենք 5 պարզ, բայց շատ օգտակար քայլ, որոնք ուսումը կդարձնեն առավել հաճելի և արդյունավետ։
Սահմանիր նպատակ
Ինքդ քեզ հարցրու․ «Ի՞նչ եմ ուզում այս տարի անել»։ Դա կարող է լինել գերազանց գնահատականներ ստանալը, քո ցանկում ներառված գրքերը կարդալը կամ պարզապես ավելի կազմակերպված ու ինքնավստահ դառնալը։ Երբ նպատակդ հստակ է, ճանապարհն էլ ավելի պարզ է դառնում:
Անպայման գրի առ նպատակներդ. հետազոտությունները ցույց են տվել, որ դա զգալիորեն բարձրացնում է դրանց իրականացման հավանականությունը։ Գրիր նպատակներդ նոթատետրիդ մեջ. ամեն անգամ, երբ կարդաս դրանք, կհամոզվես, թե որքան մոտիվացնող են ու ինչպես են քեզ քայլ առ քայլ մոտեցնում ցանկալի արդյունքին։
Հիշիր` պարտադիր չէ, որ նպատակդ մեծ լինի․ հաճախ ամենամեծ փոփոխությունները սկսվում են փոքր, բայց հաստատուն քայլերից:
Պլանավորիր օրդ
Դասերը, տնայինները և ընկերների հետ հանդիպումները պլանավորելը կօգնի կյանքդ ավելի կանոնակարգված դարձնել և նվազեցնել սթրեսը։ Օգտվիր օրացույցից, նոթատետրից կամ հեռախոսի Notes-ից, որպեսզի օրդ կազմակերպված և արդյունավետ լինի։
Երբ օրդ լավ կազմակերպված է, առաջադրանքներն ավելի հեշտ են կատարվում, իսկ ազատ պահերը կարող ես վայելել լիարժեք՝ առանց շտապելու ու անհանգստության։
Իսկ այս ամենի համար կարևոր է զարգացնել ժամանակի կառավարման հմտությունը: Դրա մասին ավելի մանրամասն պատմել ենք մեր նախորդ բլոգերից մեկում։
Ունեցիր ուսման քո փոքրիկ անկյունը
Ստեղծիր քեզ համար փոքրիկ ու հարմարավետ ուսման անկյուն։ Միջավայրը մեծ ազդեցություն ունի կենտրոնացման և հիշողության վրա։ Քեզ կարող է օգնել սեղանի վրա դրված հին խաղալիքը, պատին փակցված հետաքրքիր գրությունը, սիրելի բաժակով թեյը կամ սուրճը, նոթատետրը:
Լուսավոր ու ջերմ միջավայրը թույլ կտա հեշտությամբ կենտրոնանալ, իսկ աշխատելը ավելի արագ ու հաճելի կդառնա։
Հոգ տար առողջությանդ մասին
Քունը, առողջ սնունդը և ֆիզիկական ակտիվությունն ամենակարևոր «գործիքներն» են հաջողության հասնելու համար։ Քունն օգնում է կենտրոնանալ և պահպանել հիշողությունը, առողջ ու համաչափ սնունդն ապահովում է էներգիա, իսկ ֆիզիկական ակտիվությունը բարձրացնում է տրամադրությունը և նվազեցնում սթրեսը։ Այս երեք պարզ, բայց կարևոր սովորությունները միասին ստեղծում են արդյունավետ ուսման ու հաջողության հիմքը։
Հետազոտությունները ցույց են տալիս, որ ուսանողները, ովքեր քնում են առնվազն 7–8 ժամ ավելի արդյունավետ են ուսման ընթացքում։
Դրական տրամադրվիր
Եվ վերջապես` կլինեն դժվար պահեր. ցածր գնահատականներ, ուշացած տնայիններ կամ փոքր անհաջողություններ: Այդ պահերին հիշիր, որ սխալներն ու դժվարությունները սովորեցնում են հասկանալ սեփական ուժեղ ու թույլ կողմերը։ Այնպես որ, երբ հանդիպում ես դժվարության, մի վախեցիր, նայիր դրան որպես սովորելու և աճելու հնարավորություն. ամեն նոր մարտահրավեր մոտեցնում է քեզ նպատակիդ։
Դե ինչ, հետևիր այս պարզ խորհուրդներին, սովորիր, զարգացիր և իրագործիր քո մեծ ու փոքր նպատակները: