Այսօր բրենդների համար ամենաթանկ արժույթը վստահությունն է։ Իսկ վստահությունը ստեղծվում է ոչ թե բրենդի խոսքից, այլ մարդկանց փորձից։

Պատկերացրու՝ քո բրենդի մասին պատմում ես ոչ թե դու, այլ քո հաճախորդները։ Հենց սա է User-Generated Content-ը (UGC)։
UGC-ն կարող է ներառել կոնտենտի ցանկացած տեսակ՝ տեսանյութեր, լուսանկարներ, մեկնաբանություններ և սոցիալական մեդիայի գրառումներ, որոնք ստեղծվում են իրական օգտատերերի կողմից։ UGC-ն չի փորձում վաճառել։ Այն ցույց է տալիս իրական փորձ։
 

Համաձայն հետազոտությունների` UGC-ն մեծ ազդեցություն ունի սպառողների 79%-ի որոշումների վրա։ Այդ իսկ պատճառով այն հաճախ շատ ավելի արդյունավետ է, քան ավանդական գովազդը։

UGC-ի ամենատարածված տեսակները

UGC-ն կարող է ներկայացվել ամենատարբեր ձևաչափերով։ 

• 📦 Unboxing տեսանյութեր. Երբ հաճախորդը նկարահանում է ապրանքի բացման գործընթացը և կիսվում իր առաջին տպավորություններով։
• 📩 IG Post/Reel/Story. Լուսանկարներ կամ կարճ հոլովակներ, որտեղ երևում է ապրանքի կամ ծառայության կիրառումը իրական կյանքում։
• 💭 Մեկնաբանություններ. Սոցցանցերում հրապարակումների մեկնաբանություններում թողնված կարծիքներ, հարցեր, փորձառություններ։
• ✍🏻 Review-ներ. Ծառայության կամ ապրանքի մասին մանրամասն գնահատական և կարծիք հարթակներում, նույնիսկ` podcast-ներում։

Ովքե՞ր են ստեղծում User-Generated Content

UGC-ն միայն բլոգերների և ինֆլուենսսերների մենաշնորհը չէ։ Այն ստեղծում են՝

• hաճախորդները, ովքեր գնել են ապրանքը, հավանել այն և ցանկանում են կիսվել իրենց տպավորություններով,
• բրենդի հավատարիմները, ովքեր սիրում են քո բրենդը և պատրաստ են անվճար գովազդել այն,
• աշխատակիցները. Employee-Generated Content-ը (EGC) ցույց է տալիս բիզնեսի «ներքին խոհանոցը» և բրենդի հետևվում կանգնած իրական մարդկանց, ինչը մեծացնում է սպառողի վստահությունը։

Ինչպե՞ս է UGC-ն կարևոր բիզնեսի համար

📈 Ծախսերի կրճատում.

Պրոֆեսիոնալ ֆոտոշարքերը և գովազդային հոլովակները թանկ են։ UGC-ն անվճար (կամ շատ մատչելի) կոնտենտի աղբյուր է, որը կարող ես օգտագործել քո էջերում։

🫶 Social Proof (սոցիալական ապացույց)

Երբ պոտենցիալ գնորդը տեսնում է, որ իրական մարդիկ գոհ են ապրանքից, կասկածները վերանում են։ 

🪴Բրենդի հանդեպ լոյալության ձևավորում

Երբ բրենդը կիսվում է հաճախորդի նկարով, վերջինս իրեն գնահատված է զգում։ Սա ամրապնդում է կապը բրենդի հետ և ստեղծում համայնք։

🌐 Ճկունություն

UGC-ն կարելի է օգտագործել ամենուր՝ կայքում, գովազդային արշավներում  և սոցցանցերում։

Ինչպե՞ս խրախուսել հաճախորդներին ստեղծել կոնտենտ

Հաճախորդներին երբեմն պետք է խրախուսել, որպեսզի պատմեն քո ապրանքի մասին։ 

✅ Կարող ես հայտարարել լուսանկարների մրցույթ՝ լավագույն կադրի հեղինակին խոստանալով մրցանակ
✅ Story-ում նշելու դիմաց (mention) հաճախորդին տրամադրիր զեղչի կտրոն հաջորդ գնման համար
✅ Փոքրիկ անակնկալներ ուղարկիր ակտիվ հաճախորդներին
✅ Վերահրապարակիր այն նկարները, որտեղ հաճախորդներդ կիսվում են քո ապրանքներով կամ քո բրենդի հետ կապ ունեցող ինչ-որ բանով։ Շատերի համար բրենդի էջում հայտնվելը արդեն իսկ մոտիվացիա է:

Micro-influencers և UGC. Փոքր լսարանների մեծ ազդեցությունը

Մարքեթինգային թրենդները արագ փոփոխվում են։ Այլևս պարտադիր չէ ունենալ միլիոնավոր հետևորդներ՝ ազդեցիկ լինելու համար։
Արի ասենք, թե ինչու է 1,000-5,000 հետևորդ ունեցող միկրո ինֆլյուենսերների (կամ անգամ սովորական օգտատերերի) հետ աշխատելն ավելի շահավետ։

• Բարձր ներգրավվածություն

Փոքր էջերի լսարանը ավելի ուշադիր է և ակտիվ։

• Վստահություն

Նրանց խորհուրդներն ընկալվում են որպես ընկերոջ խորհուրդ, ոչ թե վճարովի գովազդ։

• Մատչելիություն

Նրանք հաճախ պատրաստ են աշխատել բարտերով (ապրանքի դիմաց) կամ շատ փոքր բյուջեով։

UGC-ն պարզապես մարքեթինգային թրենդ չէ։ Դա մարդկանց իրական փորձն է, որը խոսում է բրենդի փոխարեն։ Երբ բրենդը վստահում է իր հաճախորդներին, հաճախորդներն էլ սկսում են վստահել բրենդին, իսկ այդ վստահությունը ժամանակի ընթացքում վերածվում է լոյալության, ներգրավվածության և վաճառքի։