«Սովորություն է էլի». ասում ես դու ու անգամ չես նկատում, թե որքան է այդ փոքրիկ, կրկնվող գործողությունը ազդում քո այսօրվա և վաղվա վրա: Որքան էլ աննշան թվան մեր սովորությունները, ժամանակի ընթացքում դրանք դառնում են մեր կյանքի որակի ու մասնագիտական հաջողությունների հիմքը։ Այդ իսկ պատճառով այսօր Ամերիա բլոգում նախ կփորձենք հասկանալ դրանց ազդեցությունը, ապա նաև կսովորենք կառավարել դրանք:
Սովորությունների ուժը
Սովորությունները ձևավորվում են կրկնվող գործողությունների միջոցով: Նույնիսկ ամենափոքր հետևողական քայլերը կարող են ձևավորել նոր սովորություններ։ Մարդու վարքագծի շուրջ 40%-ը ձևավորվում է ոչ թե գիտակցված որոշումներով, այլ սովորություններով։ Այսինքն՝ մեր ապագան կախված է ոչ թե մեծ խոստումներից ու ծրագրերից, այլ փոքր գործողություններից, որոնք կրկնում ենք ամեն օր։
Սովորություններն ու առողջությունը
Հաճախ թվում է, թե փոքր քայլերը ոչինչ չեն փոխի, բայց իրականում հենց փոքր քայլերով ստեղծված սովորությունները ժամանակի ընթացքում փոխում են մեր մտածելակերպն ու ապրելակերպը։ Օրինակ՝ օրական ընդամենը կես ժամ քայլելը կարող է նվազեցնել սրտանոթային հիվանդությունների ռիսկը շուրջ 19%-ով։ Եթե ամենօրյա ճաշացանկիդ ավելացնես մի քանի տեսակ միրգ կամ բանջարեղեն, դրանք աստիճանաբար կուժեղացնեն քո իմունային համակարգը և կօգնեն պահպանել էներգիադ ողջ օրվա ընթացքում։
Սովորություններն ու հոգեկան առողջությունը
Հոգեկան առողջությունը ևս սերտորեն կապված է մեր սովորությունների հետ։ Օրինակ՝ եթե ամեն օր ընդամենը մի քանի րոպե տրամադրես, մտածես ու շնորհակալություն հայտնես այն ամենի համար, ինչ արդեն ունես, ժամանակի ընթացքում կզգաս, թե ինչպես է փոխվում հոգեվիճակդ:
Այս պարզ սովորությունն օգնում է ուշադրություն դարձնել կյանքի լավ կողմերին, ձևավորել դրական մտածելակերպ և նվազեցնում է դեպրեսիայի ռիսկը։ Երբ սկսում ես գնահատել նույնիսկ ամենափոքր ուրախությունները՝ դիմացինիդ անկեղծ ժպիտը, հաջողված օրը կամ ընկերոջդ անկեղծ աջակցությունը, փոխվում է նաև մարդկանց ու կյանքի հանդեպ քո տրամադրվածությունը:
Սովորություններն ու մասնագիտական հաջողությունը
Մասնագիտական հաջողությունը նույնպես պատահականություն չէ․ այն մեծապես կախված է այն սովորություններից, որ ձևավորում ես առօրյայում։ Հաճախ թվում է, թե պլանավորմանն ընդամենը 10-15 րոպե տրամադրելը մեծ բան չի փոխի։ Բայց իրականում այս փոքրիկ, հետևողական քայլերի հիման վրա կառուցվում է մասնագիտական աճդ։
Օրինակ՝ երբ ամեն օր մի քանի րոպե հատկացնում ես առաջադրանքներիդ դասակարգմանը և նպատակներիդ ձևակերպմանը, ոչ միայն խնայում ես ժամանակ, այլև նվազեցնում ես ավելորդ սթրեսդ։ Դրա արդյունքում աշխատանքդ դառնում է ավելի կազմակերպված, իսկ որոշումներդ՝ ավելի գիտակցված։
Ինչպես ձևավորել նոր սովորություններ
- Սկսիր փոքր քայլերից․ մեծ նպատակները բաժանիր իրագործելի գործողությունների։
- Ձեռքբերումներդ կապիր հաճելի արդյունքի հետ․ ինքդ քեզ պարգևատրիր առաջընթացիդ համար։
- Եղիր հետևողական․ նոր սովորություն ձևավորելու համար միջինում պահանջվում է շուրջ 66 օր:
Հիշիր` հենց ամենօրյա փոքր գործողություններն են որոշում մեր առողջությունը, հաջողությունը և բարեկեցությունը երկարաժամկետում:
Ի՞նչ անել, երբ աշխատանքն արդեն սպասում է, բայց տոնական տրամադրությունը դեռ քեզ չի լքել: Քո գլխում դեռ տոնածառի ու տոնական լույսերի փայլերն են, նվերներ բացելու ձայներն ու համեղ ուտեստների բույրերը, իսկ թասքերն ու դեդլայներն արդեն սպասում են:
Ձանձրալին՝ ավելի գրավիչ ու հետաքրքրաշարժ, իսկ բարդը` ավելի պարզ ու ընկալելի։ Պատմության ընթացքում մարդկությունը փորձել է գտնել այս բանաձևը։
Բացում ես մեյլդ ու վերջապես տեսնում՝ «Աշխատանքի առաջարկ»։
Հավատա` այդ օրը հեռու չէ, եթե «պատրաստ ես» աշխատանք գտնելուն։ Ընդամենը մի քանի պարզ քայլով դու կարող ես ավելի արագ հասնել ցանկալի արդյունքի: Ու դա մենք չենք ասում, այլ հետազոտությունների արդյունքները: