Աշխարհը շարժվում է դեպի կայուն ապագա, և մեր այսօրվա քայլերը` մեծ թե փոքր, որոշիչ են լինելու։

Բնապահպանական կայունությունը, միտում լինելուց բացի, նախևառաջ ընտրություն է` ուղղված մոլորակի բարեկեցությանը այժմ և երկարաժամկետ հեռանկարում:  

Այսօր խոսելու ենք այն մասին, թե ինչպես են մեր կայացրած որոշումները նպաստում այն միջավայրի ձևավորմանը, որտեղ ապրում ենք մենք, և որտեղ ապրելու են մեր հետագա սերունդները:

Էկոգիտակցված որոշումները առողջ ապագայի հիմքն են: Այս ուղին են որդեգրել նաև ամենատարբեր ոլորտների համաշխարհային գիգանտ ընկերությունները։ Ահա մի քանի օրինակ:

  Tesla

Tesla-ն կայուն փոխադրամիջոցների ոլորտում առաջատար ընկերություն է: Ընկերությունն արտադրում է էլեկտրական մեքենաներ` նվազեցնելով հանածո վառելիքի օգտագործումը:
 

  Apple

Apple-ի նպատակն է նվազեցնել ածխածնի արտանետումը և համագործակցել միայն այնպիսի ընկերությունների հետ, որոնք ունեն կայունությանն ուղղված արժեքներ: Նրանք հիմնականում օգտագործում են ալյումին, քանի որ այն արտադրելիս արտանետումներն ավելի քիչ են:
 

  The Body Shop

The Body Shop-ը կոսմետիկայի ընկերություն է, որն իր արտադրանքում օգտագործում է բնական և օրգանական բաղադրիչներ` միաժամանակ չկատարելով փորձարկումներ կենդանիների վրա:
 

  Google

Google-ն, ինչպես միշտ, մի քանի քայլ առաջ է: Նրանց կենտրոնները, այլ ընկերությունների համեմատ, 50%-ով ավելի քիչ էներգիա են օգտագործում, իսկ թափոնների 91%-ն աղբավայրեր ուղարկվելու փոխարեն վերամշակվում են:
 

  Estée Lauder

Այս կոսմետիկ ընկերության կողմից աղբավայրեր ուղարկված թափոնները գրեթե զրոյական են, քանի որ նրանց թափոնները կամ վերամշակվում են, կամ այրվում և վերածվում էներգիայի:
 

  Lego

Դժվար է հավատալ, որ մի ընկերություն, որի արտադրության հիմնական նյութը պլաստիկն է, ևս հակված է կայունության քաղաքականությանը։ Lego-ն արդեն իսկ որոշ չափով անցում է կատարել բուսական պլաստիկի օգտագործմանը և ներկայացրել է թղթե փաթեթավորում:

  Intel

Այս հայտնի տեխնոլոգիական ընկերությունը վերամշակում է իր թափոնների 75%-ը, իսկ օգտագործված էներգիայի 90%-ից ավելին ստանում է վերականգնվող աղբյուրներից։ 2010թ․ ցուցանիշի համեմատ՝ ընկերությունը 70%-ով կրճատել է ջերմոցային գազերի իր արտանետումները: Բացի այդ, Intel-ը նպատակ ունի մինչև 2030թ․ վերականգնել ավելի շատ ջուր, քան սպառում է:
 

 Ամերիաբանկի համար կայունությանն ուղղված օրակարգ վարելն առաջնային է:

Մենք հավատում ենք, որ պատասխանատու ենք այն աշխարհի համար, որում ապրում ենք։  Մենք մտածում ենք կանաչ` կրճատելով ջրի, թղթի սպառումը, տնկելով ծառեր, խնայելով էներգիան, իրականացնելով աղբի տարանջատում, օգտագործելով վերամշակվող նյութեր: Ի դեպ, Ամերիաբանկը ճանաչվել է Հայաստանում «Կայուն ֆինանսավորման գծով լավագույն բանկը», այն էլ ոչ մեկ անգամ:

Կայուն ընտրություն կատարելը ոչ միայն պատասխանատվություն է, այլ անհրաժեշտություն, քանի որ այսօրվա որոշումները ձևավորում են վաղվա աշխարհը և բարեկեցիկ ապագա  երաշխավորում յուրաքանչյուրի համար: