Բոլորիս կյանքում էլ լինում է, երբ գումար է պետք, բայց աշխատավարձը ստացած չենք լինում, խնայած գումար էլ չունենք: 

Ի՞նչ անել. վարկ վերցնե՞լ: Վարկատեսակներն այսօր այնքան բազմազան են. օվերդրաֆտ, վարկային գիծ, սպառողական վարկ: Ինչպե՞ս կողմնորոշվել, թե որն է քեզ պետք:

Այսօր Ամերիա բլոգում խոսում ենք վարկերի տեսակների և դրանց տարբերությունների մասին:

Օվերդրաֆտ

Օվերդրաֆտը լավագույն լուծումն է չնախատեսված իրավիճակների համար, երբ քեզ շտապ գումար է պետք, բայց այն չկա կամ չի հերիքում: Այն քո «ապահով գոտին» է, որ դու ձեռքիդ տակ միշտ գումար ունենաս:  Ենթադրենք` դու պիտի կատարես 100 000 դրամի գնում, բայց քո հաշվին ընդամենը 50 000 դրամ է: Եթե ունես օվերդրաֆտ, դու կարող ես վճարել քո 100 000-ը: Միայն թե այս դեպքում հաշիվդ կդառնա ‒50 000 դրամ: Հետո եթե քո հաշվին մուտքագրես պայմանական 200 000 դրամ, 50 000-ն ավտոմատ «կծածկի» բացասական հաշիվդ, և կմնա 150 000-ը: Ստացվում է դու միշտ էլ կարող ես վճարել այնքան, որքան թույլ է տալիս օվերդրաֆտդ, անգամ եթե հաշվիդ այդքան գումար չունես:

Կարիք չկա ամեն անգամ դիմել օվերդրաֆտի համար: Դու մեկ անգամ ստանում ես օվերդրաֆտ, և այն միշտ լինում է քո հաշվի վրա: Օվերդրաֆտի տոկոսը հաշվարկվում է միայն ծախսված գումարի նկատմամբ: Այսինքն` եթե անգամ դու ունես 1 մլն դրամ օվերդրաֆտի հնարավորություն, բայց ծախսել ես 50 000-ը, վճարելու ես միայն այդ 50 000-ի տոկոսը: Օվերդրաֆտը կցված է քո հաշվին, և այն կարող ես անվճար կանխիկացնել: Այս դեպքում առկա է նվազագույն վճար, բայց ստիպված չես լինի ամեն ամիս մեծ գումար վճարել: Հանգիստ կարող ես տարբեր չափերով մարումներ կատարել` կախված քո այդ ամսվա ֆինանսական վիճակից: Բայց պիտի հաշվի առնես, որ որքան շատ լինի օվերդրաֆտից ծախսված գումարը, այնքան շատ տոկոս կվճարես:

Ամերիաբանկում առանց գրավի օվերդրաֆտ կարող ես ստանալ աշխատավարձիդ մինչև 4-ապատիկ, իսկ որոշ ոլորտներում աշխատելու դեպքում՝ նաև 14-ապատիկի չափով: Գրավ ունենալու դեպքում դրա գնի 40-50%-ի չափով գումարի ստացումը երաշխավորված է:
Առանց գրավի օվերդրաֆտ կարող ես ստանալ օնլայն` առանց բանկ գալու:

Վարկային գիծ

Վարկային գիծը նման է օվերդրաֆտին, բայց մի փոքր այլ կերպ է աշխատում: Այս դեպքում դու ունես որոշակի սահմանաչափ, օրինակ` 1 մլն դրամ, որն առանձին հաշիվ է: Դու այդ սահմանաչափից ծախսում ես որոշակի գումար, որը պիտի ժամանակի ընթացքում մարես: Ընդ որում, ժամկետը ֆիքսված չէ. դու ստիպված չես, օրինակ, 2 տարում մարել այդ գումարը:

Տոկոսն այս դեպքում էլ հաշվարկվում է միայն ծախսված գումարի նկատմամբ: Բայց վարկային գծի գումարը 51 օրում վերադարձնելու դեպքում դու տոկոս չես վճարի: Ի տարբերություն օվերդրաֆտի` վարկային գիծը նպատակահարմար է անկանխիկ օգտագործել, քանի որ կանխիկացման վճարը բարձր է:  Այս դեպքում էլ առկա է պարտադիր նվազագույն վճար, որը կախված է ծախսված գումարի չափից: Դրանից զատ դու ես որոշում որքան ավել վճարել: Եթե ֆինանսական վիճակդ լավ է, ավել կվճարես ու կնվազեցնես պարտքդ, եթե ոչ, միայն նվազագույնը կվճարես:

Ամերիաբանկում առանց գրավի վարկային գիծ կարող ես ստանալ աշխատավարձիդ մինչև 4-պատիկի, իսկ որոշ ոլորտներում աշխատելու դեպքում՝ նաև 14-ապատիկի չափով: Գրավ ունենալու դեպքում դրա գնի 40-50%-ի չափով գումարի ստացումը երաշխավորված է:
Առանց գրավի վարկային գիծ կարող ես ստանալ նաև օնլայն` առանց բանկ գալու:
 

Սպառողական վարկ

Եթե պլանավորում ես մեծ ծախսեր կատարել և ունես կայուն եկամուտ, քեզ հարմար է սպառողական վարկը: Օրինակ` տան համար ուզում ես նոր կահույք և տեխնիկա գնել կամ պլանավորում ես թանկարժեք ճամփորդության մեկնել: Այս դեպքում կարող ես ստանալ աշխատավարձիդ մինչև 8-ապատիկի չափով գումար, բայց ամեն ամիս պիտի ֆիքսված մարումներ կատարես: Տոկոսն այս դեպքում չի հաշվարկվում ծախսված գումարի նկատմամբ: Այսինքն` եթե դու վերցրել ես 3 մլն դրամի սպառողական վարկ՝ ամսական 20%-ով, ապա վճարելու ես հենց այդ 3 մլն-ի տոկոսը` անկախ նրանից, թե որքան ես ծախսել: Բացի այդ, սպառողական վարկը պետք է մարես սահմանված ժամկետում: Այն օվերդրաֆտի ու վարկային գծի նման անժամկետ չի տրվում: Բայց գումարն էլ այս դեպքում ավելի մեծ է, և այն կարող ես կանխիկացնել: 

Ամերիաբանկում առանց գրավի սպառողական վարկ կարող ես ստանալ նաև օնլայն` առանց բանկ գալու:
 

Այսպիսով` եթե քեզ շտապ գումար է պետք կարճաժամկետ օգտագործման համար, քեզ հարմար են օվերդրաֆտն ու վարկային գիծը: Եթե գումարը կարող ես միայն անկանխիկ օգտագործել, վարկային գիծ ձևակերպիր: Եթե պետք է նաև կանխիկացնես և ուզում ես, որ միշտ հենց քո հաշվին գումար ունենաս, օվերդրաֆտ ձևակերպիր: Իսկ եթե ավելի մեծ գումար է պետք և ունես կայուն եկամուտ, որով կարող ես ամեն ամիս ֆիքսված մարումներ կատարել, կարող ես սպառողական վարկ ձևակերպել: