Ի՞նչն է քեզ` որպես անհատ կամ մասնագետ, առանձնացնում մյուսներից։ Եթե մինչև այս պահը երբեք չես մտածել այս հարցի մասին, առաջարկում ենք դա անել հիմա, քանի որ հենց այս հարցի պատասխանը կօգնի քեզ կառուցել քո անձնական բրենդը։

Իսկ ի՞նչ է իրենից ներկայացնում անձնական բրենդը և ինչո՞ւ է այն կարևոր։

Անձնական բրենդ ունենալը կարևոր գործիք է թե՛ մասնագիտական հաջողության, թե՛ ինքնարտահայտման համար։ Այն օգնում է առանձնանալ, ճանաչելի դառնալ և վստահություն ստեղծել։ 
 

Անձնական թվային բրենդ

Թվային բրենդ հասկացությունը երկար տարիներ ասոցացվել է ընկերությունների և բիզնեսների հետ։ 1990-ականների վերջում ի հայտ եկավ անձնական բրենդ հասկացությունը, որն արդեն վերաբերում էր հայտնի անձանց՝ երգիչներ, դերասաններ, մոդելներ և այլն։ Ավելի ուշ՝ սոցիալական ցանցերի տարածման արդյունքում, այս երկուսը միավորվեցին և ձևավորեցին անձնական թվային բրենդ կոչվածը, որն արդեն վերաբերում է առնվազն մեկ սոցիալական էջ ցանկացած մարդու:

Անձնական թվային բրենդինգը թույլ է տալիս վերահսկել քո մասնագիտական պատմությունը և ապահովել, որ օնլայն տվյալները, կոնտենտը ճիշտ արտացոլեն քո մասնագիտական նպատակները, արժեքները և փորձը: Այս վերահսկողությունն էական նշանակություն ունի թվային դարաշրջանում, որտեղ օնլայն տեղեկատվությունը զգալիորեն ազդում է հանրային ընկալման վրա:

Ուժեղ անհատական բրենդը կարող է դռներ բացել կարիերայի նոր հնարավորությունների համար: Գործատուներն ու հաճախորդներն ավելի հավանական է, որ շփվեն այն անհատների հետ, որոնք ունեն հեղինակավոր անձնական բրենդ:

Թվային հարթակների և սոցիալական մեդիայի դարաշրջանում անձնական բրենդն անհրաժեշտ է՝

• Մրցունակ լինելու համար: Անձնական բրենդը թույլ է տալիս առանձնանալ մասնագետների բազմությունից:
• Վստահություն ներշնչելու համար: Հստակ և հետևողական բրենդը նպաստում է քո լսարանի և հաճախորդների շրջանում վստահության ձևավորմանը:
• Նոր հնարավորություններ բացելու համար: Ուժեղ անձնական բրենդը կարող է բերել նոր հաճախորդներ, գործընկերներ և աշխատանքային առաջարկներ:
• Իրական արժեք և ազդեցություն ստեղծելու համար: Անձնական բրենդը հնարավորություն է տալիս կիսվել գիտելիքով և փորձով՝ ազդելով այլ մարդկանց վրա:
   

Ինչպե՞ս ստեղծել անձնական բրենդ

Որոշիր՝ որն է քո UVP-ն

Անձնական բրենդի հիմքում ընկած է քո յուրահատուկ արժեքային առաջարկը (UVP)՝ քո ուժեղ կողմերը և հետաքրքրությունները։ Փորձիր հստակեցնել՝ ինչու պետք է մարդիկ ընտրեն քեզ, այլ ոչ թե մեկ ուրիշին։

Ապահովիր օնլայն ներկայացվածություն

Ընտրիր մեկ կամ մի քանի սոցիալական հարթակ (LinkedIn, Instagram, YouTube, Twitter), որոնք լավագույնս են արտացոլում են քո մասնագիտական հետաքրքրությունները և նպատակները։

Ստեղծիր արժեքավոր կոնտենտ

Ստեղծիր բլոգեր, վլոգեր, փոդքաստեր, կատարիր գրառումներ սոցցանցերում և կիսվիր քո լսարանի համար օգտակար տեղեկություններով։ Մինչ այդ չմոռանաս մշակել կոնտենտի ռազմավարություն։ Ունեցիր հստակ պլան՝ ինչ թեմաներով և ինչ հաճախականությամբ ես հրապարակումներ կատարելու։

Այս հարցում քեզ շատ կօգնի սթորիթելինգը․ օգտագործիր պատմություններ լսարանի հետ ավելի ամուր կապ ստեղծելու համար։

Նեթվորքինգ

Ձևավորիր առցանց կապեր։ Հիշիր, որ ներթվորքինգի ձևավորման արագությունն ուղիղ համեմատական է սոցցանցերում քո ակտիվությանը․մասնակցիր քննարկումների, կիսվիր քո կարծիքով և փորձով: Փորձիր կապ հաստատել ոլորտի առաջատարների հետ: Հետևիր նրանց, մեկնաբանիր և մասնակցիր նրանց էջերում ծավալվող քննարկումներին։ Այսպես ավելի շուտ ուշադրություն կգրավես։

Հետևիր թրենդներին

Անձնական բրենդը պետք է զարգացնել՝ հաշվի առնելով թվային ոլորտի թրենդները։ Այստեղ քեզ կարող է օգնության գալ Արհեստական բանականությունը՝ AI-ը: Օգտագործիր AI գործիքներ կոնտենտ ստեղծելու և վերլուծելու համար։ Փորձիր ստեղծել ինտերակտիվ կոնտենտ՝ հարցումներ, ուղիղ հեռարձակումներ կամ խաղեր՝ լսարանի ներգրավվածությունը մեծացնելու համար։ Մեր նախորդ բլոգերից մեկում ներկայացրել ենք նաև AI-ն արդյունավետ օգտագործելու նրբությունները։

Հաշվի առ, որ վիդեոկոնտենտը շարունակում է մնալ անգերազանցելի գործիք անձնական բրենդի զարգացման տեսանկյունից։ Forrester Research-ի կողմից անցկացված ուսումնասիրությունները փաստում են, որ տեսանյութի մեկ րոպեն համարժեք է 1,8 միլիոն տպագիր բառի:

Կառավարիր քո թվային հեղինակությունը

Հետևիր, թե ինչ է գրվում քո մասին համացանցում: Օգտագործիր Google Alerts կամ նմանատիպ գործիքներ՝ քո անվան հիշատակումներին հետևելու համար։ Քննադատություններին պատասխանիր կառուցողական կերպով և օգտագործիր թե´ դրական, թե´ բացասական կարծիքները քո բրենդը բարելավելու համար:

Պաշտպանիր քո անունն ու բրենդը հնարավոր վնասակար տեղեկատվությունից: Արագ արձագանքիր ապատեղեկատվությանը և պարզաբանիր իրավիճակը։

Անձնական բրենդի ստեղծումը շարունակական գործընթաց է, որը պահանջում է ռազմավարական մոտեցում, հետևողականություն և ճկունություն։ Օգտագործելով այս մեթոդները՝ դու էլ կարող ես ստեղծել ուժեղ և ազդեցիկ անձնական բրենդ, որը կբացի նոր հնարավորություններ թվային դարաշրջանում։