Բացում ես մեյլդ ու վերջապես տեսնում՝ «Աշխատանքի առաջարկ»։ 

Հավատա` այդ օրը հեռու չէ, եթե «պատրաստ ես» աշխատանք գտնելուն։ Ընդամենը մի քանի պարզ քայլով դու կարող ես ավելի արագ հասնել ցանկալի արդյունքի: Ու դա մենք չենք ասում, այլ հետազոտությունների արդյունքները:

Այսօր Ամերիա բլոգում պատմում ենք այն մասին, թե ինչին պիտի ուշադրություն դարձնես` աշխատանք գտնելու համար:=

CV

Երևի շատ ես լսել. «Պետք է գրագետ CV կազմել»: Հանգիստ. չենք պատրաստվում նույնն ասել ու առաջ անցնել: Փոխարենը կպատմենք, թե կոնկրետ ինչ պիտի անես և ինչու:

Ինքդ էլ տեսնում ես, թե AI-ն (Artificial Intelligence) ինչ արագ է զարգանում: Հավատա` արդեն հասել է նաև քո CV-ին: Խոշոր ընկերություններում, որտեղ դիմորդների թիվը 400+ է, մինչև HR մասնագետին հասնելը CV-ն ևս մեկ փորձություն է անցնում: Դա Application Tracking System-ն (ATS) է:

Համակարգը, այսպես ասած, սքանավորում է քո CV-ն և անցկացնում այն HR մասնագետի դիտարկման փուլ կամ ոչ: Հետազոտություններից մեկի համաձայն` CV-ների 75%-ն այդպես էլ չի հասնում HR մասնագետին:

Խորհուրդ: CV-իդ մեջ ներառիր քո մասնագիտության և պահանջվող հմտությունների վերաբերյալ բանալի բառեր. թող ATS-ը հասկանա, որ դու համապատասխան թեկնածու ես: Անպայման ներառիր հենց այն հմտությունները, որոնք պահանջվում են հայտարարության մեջ։ «Դասավորիր» բոլոր տվյալները` բաժիններ առանձնացրու ու համարակալիր: Սա կարևոր է ոչ միայն ռոբոտի, այլև մարդու համար: Պատկերացրու, թե քեզ նման քանի հոգի է դիմում: HR մասնագետներն ամեն CV-ին միջինում հատկացնում են 20-30 վայրկյան: Ընտրիր ընթեռնելի տառատեսակ և տառաչափ, առանձին բաժիններ հատկացրու քո հմտություններին, կրթությանը, փորձին ու կոնտակտներին: Այնպես արա, որ ֆոնի և տեքստի գույնի կոնտրաստը մեծ լինի, որ կարդալու համար ոչ ոք ստիպված չլինի լարել տեսողությունը:

Կապեր (Networking)

Անձնական ու աշխատանքային կապերը մեծ դեր ունեն աշխատանք գտնելու հարցում: Հիմա կասես` միայն Հայաստանում է այդպես, բայց ոչ: ԱՄՆ-ում 2019-ին Jobvite-ի հետազոտությունը ցույց է տվել, որ աշխատանք փնտրողների 50%-ն աշխատանքի մասին լսել է ընկերներից, իսկ 37%-ը` ծանոթներից:  Միայն 13%-ն աշխատանքի մասին իմացել այլ աղբյուրներից: Մեկ այլ` LinkedIn-յան հետազոտության համաձայն` աշխատատեղերի 85%-ը համալրվում է հենց networking-ով:

Խորհուրդ: Մասնակցիր մասնագիտական սեմինարների, վեբինարների և այլ միջոցառումների: Մասնագետների հետ փոխանակվիր համարներով ու սոցէջերով: Հետո կտեսնես, թե կապերն ինչ արժեքավոր կապիտալ են քեզ համար: Այս հարցում քեզ LinkedIn-ն էլ շատ կօգնի: Այստեղ դու կարող ես connect-ի հայտեր ուղարկել քո ոլորտի մասնագետներն, հարցեր ուղղել, շփվել նամակագրությամբ կամ մեկնաբանություններով: Եթե նրանք մեկնաբանություն թողնեն քո հրապարակման տակ, քեզ կտեսնեն նաև իրենց connect-ները: Այդպես դու շատերի համար տեսանելի կլինես, HR մասնագետներն էլ քեզ հեշտ կգտնեն:
Բայց LinkedIn-ն այլ պատմություն է, դրա մասին առանձին պիտի խոսենք:

LinkedIn

Այսօր LinkedIn-ը գործատու և աշխատակից գտնելու ամենատարածված հարթակն է: Ըստ հետազոտությունների` HR մասնագետների 77%-ի համար LinkedIn-ը մասնագետ գտնելու հիմնական գործիքներից է: 

Խորհուրդ: LinkedIn-ի քո էջում բանալի բառեր օգտագործիր, որ HR մասնագետները հեշտորեն գտնեն քեզ: About բաժնում կարճ գրիր քո փորձի, հմտությունների, հնարավորության դեպքում նաև քո գրանցած որևէ տպավորիչ արդյունքի մասին: Թվերով խոսելու դեպքում կբարձրացնես քո հանդեպ վստահությունը: Մի զլացիր մասնագետներին connect-ի հայտեր ուղարկել, ընդունել, հրապարակումներ անել կամ մեկնաբանել: Որքան ակտիվ լինես, բանալի բառեր օգտագործես ու որակյալ network ստեղծես, այնքան կմեծանա որոնման արդյունքներում հայտնվելու ու աշխատանք գտնելու հավանականությունը:

Միացրու Job alert-ը, որ միշտ ծանուցումներ ստանաս քո պրոֆիլին համապատասխան աշխատանքների մասին: Նաև ակտիվացրու Open to work-ը, որ HR մասնագետները տեսնեն, որ բաց ես աշխատանքի համար:

Աշխատանքի որոնման հարթակներ

Աշխատանք փնտրելու շատ օնլայն հարթակներ կան, դրանք գուցե արդեն փորձած լինես: Դրանցից են job.am-ը, worknet-ը, myjob.am-ը, careercenter.am-ը, ֆրիլանսի համար հայտնի են Upwork-ը, Fiverr-ը:
Հայկական ամենամեծ հարթակը staff.am-ն է, որտեղ կգտնես Հայաստանի թոփ գործատուներին ու առկա թափուր հաստիքները: Այստեղ կարող ես միանգամից օնլայն CV ստեղծել. ձևը կա, դու միայն պիտի լրացնես տվյալները: Դրանց հիման վրա համակարգը քեզ կառաջարկի աշխատանքներ ու թրեյնինգներ: Staff.am-ում Ամերիայի թափուր հաստիքները կարող ես տեսնել այստեղ: 

Խորհուրդ: Գրանցվիր աշխատանքի որոնման հարթակներում, որ ծանուցումներ ստանաս քեզ հետաքրքրող աշխատանքների վերաբերյալ: Հաշվի առ, որ որոշ ընկերություններ կարող են չտեղադրել հայտարարությունները այս հարթակներում և պարբերաբար այցելիր նրանց պաշտոնական կայքեր: Կարող ես նաև միանալ ֆեյսբուքյան, տելեգրամյան կամ ինստագրամյան մասնագիտական խմբերին: Շատ ընկերություններ այդտեղ նույնպես տեղադրում են հայտարարություններ:

Մասնագիտական կուրսեր

Մասնագիտություններն արագ են զարգանում: 10-յակ տարիներ առաջ գովազդները թերթերում էին տպագրվում, հետո եկավ համացանցը: Ոմանք պատրաստվեցին նոր իրողությանը, ոմանք ոչինչ չարեցին ու կորցրին աշխատանքը:

Այսօր էլ սպառողների վարքագծի փոփոխությունն ու AI-ն են աշխատաշուկային նոր պահանջներ թելադրում, ու դու պիտի պատրաստ լինես դրան:

Խորհուրդ: Պարբերաբար մասնագիտական թրենդերի մասին հոդվածներ կարդա ու կուրսեր անցիր` հմտություններդ զարգացնելու համար: Ծանոթացիր AI գործիքներին, ուսումնասիրիր` ինչպես կարելի է կիրառել դրանք քո աշխատանքում: Եթե որևէ բան ամեն անգամ խանգարում է քեզ դիմել աշխատանքի համար, զարգացրու այդ հմտությունդ: Օրինակ, եթե դա անգլերենի իմացությունն է, մտածիր` ավելի լավ չէ՞ որոշ ժամանակ սովորել, որ հետո նույն խնդրին չբախվես: Մասնագիտական ու լեզվական հմտությունների զարգացման հարցում քեզ կարող են օգնել Coursera-ն, Duolingo-ն, HubSpot Academy-ն, Udemi-ն, 42courses, MasterClass-ն ու շատ այլ հարթակներ: Կարող ես նաև վերցնել կուրսեր, որոնք կօգնեն քեզ կիրառել AI-ը քո աշխատանքում:

Հիշի′ր` եթե դու և քեզ նման մասնագիտական ունակություններով մեկը դիմեք նույն աշխատանքի համար, հաջողությունը կախված կլինի հենց այս հարցում քո գրագետ մոտեցումից: Այնպես որ, ուշադրություն դարձրու այս գործոններին: Բոլորին նույն CV-ն ուղարկելու փոխարեն անհատականացրու և համապատասխանեցրու ընկերության պահանջներին: Պարբերաբար թարմացրու LinkedIn-իդ էջն ու ստեղծիր որակյալ network: Ժամանակի հետ քայլիր  ու միշտ զարգացրու մասնագիտական հմտություններդ, որ շարունակես պահանջված լինել աշխատաշուկայում: