Մեր բլոգում բազմիցս խոսել ենք ֆինանսական գրագիտության մասին և եկել այն եզրակացության, որ երեխաների հետ ֆինանսների ու փողի մասին խոսելը դժվար է, բայց շատ անհրաժեշտ:
Այս անգամ ընտրել ենք ֆինանսների մասին երեխաների համար նախատեսված մի քանի գիրք, որոնք կօգնեն ձեզ երեխաներին ֆինանսապես գրագետ դարձնելու հարցում:
Տատյանա Պոպովա «Կախարդական բանկոմատը․ տնտեսագիտության մասին՝ երեխաներին»
Սա հետաքրքիր և ուրախ պատմություն է կախարդական բանկոմատով կղզում հայտնված երեխաների մասին։ Գրքում ներկայացված են բանկային տերմինների բացատրությունները, իսկ ամեն գլխի վերջում կան փոքրիկ վարժություններ, հանելուկներ և խաղեր՝ ստացած գիտելիքը ամրապնդելու համար։
Գիրքը նախատեսված է 5 և ավելի բարձր տարիքի երեխաների համար։
Սերգեյ Ֆեդին «Ֆինանսական գրագիտություն»
Սա ֆինանսական գրագիտության «այբուբեն» է` նախատեսված տարրական դասարաններում սովորող երեխաների համար։ Գրքի առաջին մասում հեղինակը պատմում է, թե ինչ է գումարը և դրա առաջացման պատմությունը, իսկ երկրորդ մասի հիմնական թեման ընտանեկան բյուջեն է։ Գրքում կան զվարճալի վարժություններ, նկարներ և կատակներ։ Գրքի ամեն մասի հետ հատկացվում է աշխատանքային տետր, որով կարելի է զբաղվել թե՛ տանը, թե՛ դպրոցում։
Բոդո Շեֆեր «Մանի անունով շունը կամ ֆինանսների այբուբեն»
Արկածային այս գիրքը վերլուծում է մարդու և ֆինանսների փոխհարաբերությունները։ Հերոսների օրինակով հեղինակը սովորեցնում է խնայել և քայլ առ քայլ վերլուծում է երազանքին հասնելու բանաձևը։ Գրքում քննարկվում է մեկ կարևոր թեմա ևս. ինչպե՞ս թույլ չտալ, որ փողը փչացնի մարդուն։
Գիրքը հիմնականում նախատեսված է տարրական և միջին դասարաններում սովորող երեխաների համար, սակայն մեծերի համար ևս գիտելիքների լավ աղբյուր է։
Ջերի Բեյլի, Ֆելիցիա Լո «Քո փողերը»
Այս գրքից դեռահասները կարող են սովորել՝ ինչպես լինել ֆինանսապես անկախ, ինչու են վտանգավոր մոլախաղերը և նման կասկածելի աղբյուր ունեցող եկամուտները, ինչպես հասնել նպատակին և ինչպես հետագայում սեփական բիզնես սկսել։ Գիրքը կօգնի խուսափել պարտքերից և պաշտպանվել զեղծարարներից, իսկ գրքի վերջում ֆինանսական բառարան կա, որը կօգնի ցանկացած պահի թարմացնել գիտելիքները։
Խորհուրդ է տրվում միջին դասարաններում սովորող երեխաներին։
Եվգենիա Բլիսկավկա «Երեխաները և փողը․ ընտանեկան ինքնուսույց երեխաների համար»
Եթե չգիտես՝ ինչպես սկսել երեխաների հետ զրույց ֆինանսական թեմայով, ապա այս գիրքը քեզ համար է։ Այն սկսվում է պարզագույն հարցադրումներով և սովորեցնում հաշվարկել բյուջեն, համեմատել տարբեր ապրանքների գները՝ առաջնահերթությունները տարբերակելու համար։ Գրքի օրինակներով երեխան կհասկանա, թե արդյոք արդարացված է այս կամ այն ծախսը։ Ամեն թեմա ունի համապատասխան վարժություն:
Այս գիրքը նախատեսված է 5 և ավելի բարձր տարիքի երեխաների համար։
Իգոր Լիպսից «Զարմանալի արկածներ Տնտեսագիտություն երկրում»
Տնտեսագիտական գիտությունների դոկտոր Իգոր Լիպսիցն իր այս գրքում պատմում է Տնտեսագիտություն անունով երկրի և դրա օրենքների մասին։ Հեղինակը երբեմն խոսում է ոչ այնքան մանկական թեմաներից, օրինակ՝ ինչպես է տնտեսագիտությունն ազդում համաշխարհային իրադարձությունների վրա։ Գիրքը ոչ միայն երեխաների, այլև մեծերի համար է։
Ռոբերտ Կիյոսակի «Հարուստ հայրիկ, աղքատ հայրիկ» դեռահասների հ
ամար
Ի սկզբանե գիրքը մեծերի համար էր, բայց բեսթսելլեր դառնալուց հետո հեղինակը որոշեց այն հասանելի դարձնել ավելի լայն լսարանի։ Գիրքը մոտիվացնում է դեռահասներին հնարավորինս շուտ սկսել ֆինանսական որոշումներ կայացնել, սահմանել հստակ նպատակներ և մտածել ապագայի մասին։ Գիրքը դեռահասներին օգնում է ընդարձակել ֆինանսական աշխարհայացքը և մտածել ստանդարտներից դուրս։
Հույս ունենք, որ հավանեցիր նյութն, իսկ մեր առաջարկած գրքերն օգտակար կլինեն քո երեխաներին: