Եթե Հայաստանում փոքր բիզնեսով ես զբաղվում, ամենայն հավանականությամբ կատարում ես մի քանի գործ միաժամանակ։ Հաճախ գումար խնայելու պատճառով յուրաքանչյուր խնդրի համար մասնագետ չես վարձում, սկսում ես ինքդ գլուխ հանել ամեն ինչից, խճճվում ես պարտականությունների ու գործերի մեջ`  հաճախ չտարբերելով առաջնայինը երկրորդականից։ Արդյունքում կարող ես անել ծախսեր, որոնցից հնարավոր է խուսափել՝ ընդամենը մեկ անգամ վճարելով ավտոմատացման որևէ համակարգ ներդնելու համար։ 
Ավտոմատացնել կարելի է գրեթե ամեն ինչ, ընդ որում, բիզնեսը հիմնելու հենց առաջին օրվանից։ Սակայն լինում են դեպքեր, երբ փոքր բիզնեսի ավտոմատացումը ծայրահեղ անհրաժեշտություն է։ 

Ե՞րբ է պետք ավտոմատացնել բիզնես գործընթացները

Բիզնեսն աճում է, ու աշխատակազմն այլևս ֆիզիկապես չի հասցնում սպասարկել ու լուծել ծառացած խնդիրները։ 

• Չափից շատ հանձնարարություններ ու պատվերներ կան, և ստեղծվել է քաոտիկ իրավիճակ։
• Պետք է արագացնել պրոցեսները, որոնց վրա չափազանց շատ ժամանակ է ծախսվում։

Կամ եթե նույնիսկ այդ պահին բոլորն ամեն ինչ հասցնում են, չի երևում զարգանալու հեռանկարը։ Իսկ ավտոմատացնելու դեպքում ամեն ինչ կլինի մի քանի անգամ ավելի արդյունավետ, ու հնարավոր կլինի բավականաչափ միջոցներ խնայել։ 
Սովորաբար բիզնեսում առաջին հերթին ներդնում են CRM համակարգեր։ Այն ավտոմացման ամենատարածված ձևերից մեկն է։ Դրա միջոցով հնարավոր է հաճախորդների տվյալները հավաքել մեկ տեղում և վերահսկել հաճախորդների սպասարկումը։ 

CRM համակարգը պահպանում է հաճախորդների տվյալները՝ էլ․ փոստի հասցեն, հեռախոսահամարը, բնակության հասցեն, եթե տրամադրվել է, գործարքների ամբողջ պատմությունը և այլն։ Նման համակարգերը կարևոր են մի քանի պատճառով։ Նախ հնարավորություն են տալիս պատկերացում կազմել ամբողջ գործընթացի մասին։ Այդ կերպ հնարավոր է լինում խնդիրները կանխարգելել նախնական փուլում, նաև վերահսկել հաճախորդների հետ հարաբերությունների մակարդակը, քանի որ մարդկային գործոնը հասցվում է նվազագույնի։

CRM֊ի տարբերակները շատ են, սակայն Հայաստանում ոչ բոլոր տարբերակներն են կիրառելի։
Մենք մտածեցինք, թե ինչով կարող ենք քեզ օգտակար լինել ու առանձնացրինք հենց նման դեպքերի համար ստեղծված գործիքները: 

Ահա 9 գործիք`  փոքր բիզնեսն արդյունավետ կառավարելու և գործընթացներն ավտոմատացնելու համար։

«Битрикс24»  - Այստեղ պատրաստի լուծումներ կան հատկապես ինտերնետ խանութների, իրավաբանական ընկերությունների ու մեծածախ առևտրով զբաղվող բիզնեսների համար։ Սակայն կարելի է նաև հարմարեցնել յուրաքանչյուրի անհատական կարիքներին։  Ի դեպ, սա ներդնելու ու դրանից օգտվելու համար պարտադիր չէ լինել համակարգային ադմինիստրատոր կամ ծրագրավորող։

AmoCRM - Սա նվազագույն գործիքակազմով հարթակ է, որը ներառում է հաճախորդների քարտեր, վաճառքների վիզուալիզացիա, հեռախոսային կապի ու տվյալների ինտեգրացիա։  

RetailCRM - Ամպային CRM`  նախատեսված օնլայն խանութների համար։ Աշխատում է մեկ պատուհանի սկզբունքով, այսինքն՝ մենեջերները պատվերներին ու պահեստավորման գործընթացին հետևում են մեկ վայրում։ Այն նաև առանձին հավելված ունի հատուկ Instagram-ում վաճառքների համար՝ retailCRM Chat։

Pipedrive - միջազգային CRM, որից օգտվում են հիմնականում խոշոր ընկերություններն ամբողջ աշխարհում։ Բայց փոքր բիզնեսները նույնպես հանգիստ կարող են օգտվել այս համակարգից, եթե հետագայում ընդլայնվելու հեռանկարներ կան։ 

Մարքեթինգի ավտոմատացում 

Ժամանակակից թվային մարքեթինգի պարագայում նույնպես բավականաչափ աշխատանք է տարվում, որը հնարավոր է ավտոմատացնել ու ավելի շատ ժամանակ թողնել ստեղծագործական աշխատանքի համար։ Առավել ևս, որ բազմաթիվ ավտոմատացման գործիքներ նաև կարող են օգտակար լինել այլ հարցերում։

Մեյլերով նամակների ուղարկում

SendPulse - հաշվի առնելով ռուսալեզու մասնագետների մեծ հոսքը Հայաստան՝ այս գործիքն արդեն ավելի քան ակտուալ է։ Ռուսալեզու email-հարթակ է՝ բավականին հասկանալի ու ինտուիտիվ ինտերֆեյսով։ Նամակները հավաքվում են հատուկ կոնստրուկտորում, իսկ ուղարկման շղթաները՝ հատուկ վիզուալ խմբագրիչում։ Անհրաժեշտ չէ ունենալ ծրագրավորման գիտելիքներ այս հարթակից օգտվելու համար։ Ունի անվճար և վճարովի տարբերակներ։ 

MailChimp - email-հարթակ, որն անգամ անվճար տարբերակում տալիս է իր ամբողջ ֆունկցիոնալից օգտվելու հնարավորություն։ Բավականին հաջող կերպով ինտեգրվում է Google Analytics-ի, Tilda-ի, Facebook-ի, Shopify-ի հետ։ 

eSputnik - CDP-հարթակ, որն օգնում է միավորել կոնտակտային տվյալները մեկ պրոֆիլում, կարգավորել հաճախորդների հետ համագործակցության հնարավոր սցենարները։ Կարելի է տարատեսակ առաջարկները կարգավորել՝ ըստ հաճախորդների հետաքրքրությունների ու կարիքների։ 

Նախագծերի կառավարման գործիքներ

Թիմային աշխատանքն առաջին հերթին նշանակում է թափանցիկություն և հարմարավետություն թիմի բոլոր աշխատակիցների համար։ Այդ հարցում կարող է օգնել նախագծերի կառավարման ավտոմատացումը։ Կան բազմաթիվ հարթակներ, որտեղ ցանկացած նախագիծ, կլինի դա առաքում թե մարքեթինգային արշավ, գտնվում է մեկ էկրանի վրա, և յուրաքանչյուր մասնակից կարող է տեսնել, թե նախագիծն ինչ փուլում է գտնվում։  
Օրինակ, երբ որևէ նախագծում ներգրավված են մեծ թվով աշխատակիցներ, դու կարող ես միաժամանակ հետևել բոլորի աշխատանքի ընթացքին ու չափել կատարված աշխատանքի արդյունավետությունը։ 

Trello - այս ոլորտում ամենամեծ տարածում ունեցող հարթակը։ Բավականին ինտուիտիվ է ու հասկանալի։ Մեկ հանձնարարություն, մեկ աշխատանքային քարտ։ Ցանկացած առաջադրանքի կատարում բաժանվում է քայլերի և հատուկ կոճակների միջոցով հնարավոր է լինում տեղաշարժել քարտերն ըստ կատարման աստիճանի։ Trello-ն ունի վճարովի և անվճար տարբերակներ։ Zapier  կոչվող գործիքի միջոցով հնարավոր է ինտեգրել Google Drive, MailChimp, Slack-ի։ 

Asana - սա ամենաբազմաֆունկցիոնալ ու մեծ տարածում ունեցող գործիքներից է։ Այստեղ առաջադրանքները տեսակավորվում ու վիզուալիզացվում են 5 տարբեր մեթոդներով՝ ցանկ, օրացույց, ժամանակացույց, քարտեր, պլանավորում (planner): Յուրաքանչյուրն ընտրում է իրեն հարմար տարբերակը։ 

Այս ամենին ադապտացվելուց հետո կներկայացնենք արդեն մի փոքր ավելի բարդ գործընթացների ավտոմատացման ու կառավարման գործիքներ։