Թիմի հաջողությունն առաջին հերթին կախված է մարդկանցից։ Ներգրավված և մոտիվացված աշխատակիցները կազմակերպության արդյունավետության առանցքային գործոններից են։
Մոտիվացիայի կարևորությունը անձնակազմի կառավարման մեջ
Աշխատակիցների ներգրավվածության մակարդակն ամբողջ աշխարհում նախորդ տարի նվազել է 2%-ով՝ հասնելով 21%-ի։ Դա հանգեցրել է արտադրողականության նվազման և համաշխարհային տնտեսությանը հասցրել շուրջ 438 միլիարդ դոլարի վնաս։
Աշխատակիցների մոտիվացիան ուղղակիորեն ազդում է արտադրողականության, համագործակցության և հաճախորդների բավարարվածության վրա։ Այնպես որ, մոտիվացիան պետք է դիտարկել ոչ թե որպես հավելյալ արժեք, այլ որպես կազմակերպական մշակույթի հիմնասյուն։
Բացահայտիր` ինչն է մոտիվացնում քո աշխատակիցներին
Մարդիկ տարբեր են: Մեկին մոտիվացնում է աճի հնարավորությունը, մյուսին՝ թիմային միջավայրը։
Առաջին քայլը հասկանալն է՝ ինչն է իրականում կարևոր քո թիմի համար․
💬 Նրանց համար առաջնային է մասնագիտական հմտությունների բարելավո՞ւմը,
💬 գնահատված զգա՞լը,
💬 թե՞ առավել կարևոր է ճկուն գրաֆիկն ու աշխատանք-կյանք հավասարակշռությունը։
Աշխատակիցների մոտիվացիայի աղբյուրը բացահայտելուց հետո փորձիր ներդնել արդյունավետ խրախուսման համակարգ`
🎁 բոնուսներ՝ կատարված աշխատանքի արդյունքների հիման վրա,
💚 առողջապահական ապահովագրություն կամ հավելյալ արտոնություններ,
📚 շարունակական զարգացում և որակավորման բարձրացման հնարավորություն:
Ինչպե՞ս մոտիվացնել աշխատակիցներին` առանց մեծ ծախսերի
Հիշիր` ոչ նյութական մոտիվացիան հաճախ ավելի կայուն է, քան դրամական պարգևատրումները:
🌱 Ճկուն աշխատանքային գրաֆիկ․ առաջնային կարևորություն տուր ոչ թե աշխատավայրում անցկացրած ժամանակին, այլ արդյունքին։
🌱 Գնահատված աշխատանք․ օրինակ` շաբաթական կամ ամսական կտրվածքով օր որոշիր` նշելու աշխատակիցների հաջողությունները և շնորհավորելու մասնագիտական նվաճումները:
🌱 Գաղափարների փոխանակում և team-building-ներ․ փորձիր կազմակերպել թիմային հանդիպումներ ոչ ֆորմալ միջավայրում կամ «brainstorming» սեսիաներ, որտեղ բոլորը կարող են ազատ արտահայտել իրենց կարծիքներն ու առաջարկները:
🌱 Անձնական աճի աջակցություն․ առաջարկիր դասընթացներ, փոդքասթեր, տեսանյութեր կամ գրքեր, որոնք աշխատակիցները կարող են թե’ ինքնուրույն ուսումնասիրել, թե’ մասնակցել:
Այս քայլերը քեզ թույլ կտան բարձրացնել աշխատակիցների մոտիվացիան առանց մեծ ֆինանսական ներդրումների` միաժամանակ ստեղծելով վստահելի աշխատանքային միջավայր։
Սահմանիր հստակ նպատակներ և գնահատիր արդյունքները
Մարդիկ մոտիվացված են, երբ տեսնում են իրենց աշխատանքի արդյունքը։ Հստակ նպատակներն ու չափելի արդյունքները օգնում են աշխատակցին հասկանալ իր դերը ընդհանուր հաջողության մեջ։ BlessingWhite Research-ի հարցման մասնակիցների 20%-ը նշել է, որ իրենց աշխատանքի արդյունավետությունը կբարձրանար, եթե նրանք ունենային ավելի հստակ պատկերացում իրենց պարտականությունների և կազմակերպության նպատակների մասին։
Ի՞նչ սխալներից է պետք խուսափել անձնակազմը կառավարելիս
🚫 Micromanagement (չափից շատ վերահսկողություն)․ աշխատակիցների ամեն քայլափոխը հսկելը հանգեցնում է ինքնուրույնության և ինքնավստահության կորստի։
🚫 Կարծիքի անտեսում․ աշխատակիցների ներգրավվածությունը նկատելիորեն կարող է նվազել, երբ իրենք զգում են, որ իրենց ձայնը լսելի չէ։
🚫 Կողմնակալ վերաբերմունք․ սուբյեկտիվ հիմունքներով որոշ աշխատակիցների նկատմամբ դրական վերաբերմունքը կարող է անարդարության զգացում առաջացնել մյուս աշխատակիցների մոտ և խարխլել թիմի համերաշխությունը։
🚫 Չգնահատված աշխատանք. ոչ մի աշխատակից չի մնա մոտիվացված, եթե իր ջանքերը չեն նկատվում։
🚫 Հաղորդակցման պակաս. չարդարացված սպասումները և ոչ հստակ նպատակները բերում են հիասթափության։
Անձնակազմի կառավարումը միայն գործընթաց չէ, այլ մշակույթ։ Երբ յուրաքանչյուր աշխատակից զգում է, որ իրեն վստահում են, լսում և գնահատում, թիմը դառնում է երկարաժամկետ հաջողության շարժիչ ուժ: