Ինչպե՞ս մնալ մրցունակ փոփոխվող աշխարհում
Արհեստական բանականություն, ավտոմատացում, նորարարական տեխնոլոգիաներ․ աշխարհը շարունակում է արագ փոխվել, աշխատաշուկան՝ ևս։ Տասնյակ մասնագիտություններ նոր են առաջանում, որոշները՝ անհետանում։
Վերապատրաստումն ու որակավորման բարձրացումն այսօր ոչ միայն ցանկալի են, այլ մասնագիտական ուղու անհրաժեշտ բաղադրիչ։ Ըստ World Economic Forum-ի "The Future of Jobs Report" զեկույցի՝ ինչ սովորում ես համալսարանում, նախքան ավարտելդ արդեն ակտուալ չէ։ Այստեղ է, որ վերապատրաստումը (reskilling) և վերաորակավորումը (upskilling) դառնում են կարիերայի զարգացման հիմքեր։
Ի՞նչ է որակավորման բարձրացումը և վերապատրաստումը
- Որակավորման բարձրացումն առկա գիտելիքների և հմտությունների խորացումը կամ արդիականացումն է
- Վերապատրաստումը նոր հմտությունների ձեռքբերումն է, հատկապես երբ փոխում ես ոլորտը կամ ստանձնում այլ գործառույթ
Երկուսն էլ կարևոր են և հաճախ պետք է զուգորդվեն։
Հմտություններ, որոնք կօգնեն քեզ չմնալ տեղում
Անկախ մասնագիտությունից` կան հմտություններ, որոնք այսօր պետք են բոլորին և որոնք հնարավոր է զարգացնել վերապատրաստումների միջոցով։
- Թվային գրագիտություն և նոր տեխնոլոգիաների կիրառում. Excel-ից մինչև AI գործիքներ՝ կարևոր է ոչ միայն օգտագործել, այլև հասկանալ դրանց ընդհանուր տրամաբանությունը։ Ի դեպ, AI գործիքների ճիշտ կիրառման ուղեցույց կգտնես մեր նախորդ բլոգում։
- Տվյալների վերլուծություն և թվային մտածողություն. կօգնի կայացնել տվյալահեն որոշումներ։
- Հաղորդակցման և թիմային աշխատանքի հմտություններ․ ժամանակակից աշխատաշուկան պահանջում է պարզ, ճկուն ու արդյունավետ համագործակցություն։
- Ճկունություն և սովորելու ունակություն կամ վերաորակավորման պատրաստակամություն. աշխատանքային արագ փոփոխվող պահանջները պահանջում են նույնքան արագ հարմարվելու կարողություն։
- Փափուկ հմտություններ (soft skills). ուշադրություն մարդկանց հանդեպ, կառուցողական հաղորդակցում, խնդիրների լուծում։ Հենց այս որակներն են որոշում՝ ով է թիմում աճում։
Որտեղի՞ց սկսել
Ուսում առանց պլանի= շարժում առանց նպատակակետի
Ոչինչ արդյունավետ չի աշխատում առանց հստակ պլանի ու նպատակի։ Ի՞նչ ես ուզում սովորել, ինչի՞ համար ու ի՞նչ ժամկետներում։ Սրանք պարզ հարցեր են, բայց պատասխանները կօգնեն չկորցնել մոտիվացիան։ Հետևիր այս քայլերին՝
- Նշիր կոնկրետ հմտությունը, որը ցանկանում ես զարգացնել
- Ֆիքսիր՝ ինչ օգուտ կտա քեզ այդ գիտելիքը
- Ընտրիր համապատասխան ուսումնական նյութերը
- Կազմիր գրաֆիկ, թե շաբաթական որքան ժամանակ ես տրամադրելու
- Հետևիր առաջընթացիդ՝ գրանցելով նույնիսկ ամենափոքր արդյունքը
Ի՞նչ հարթակներից օգտվել
Մասնագիտական զարգացման և վերապատրաստման նպատակով կարող ես օգտվել տարբեր հարթակներից՝ աշխարհի առաջատար բուհերի հետ համագործակցող ակադեմիական հարթակներից մինչև պրակտիկ գիտելիքներ փոխանցող մասնագիտացված կայքեր։ Ահա մի քանիսը․
Coursera։ Համագործակցում է այնպիսի բուհերի ու կազմակերպությունների հետ, ինչպիսիք են Stanford-ը, Yale-ը, Google-ը և այլք՝ առաջարկելով ինչպես անվճար, այնպես էլ սերտիֆիկացված դասընթացներ
edX։ Harvard-ի և MIT-ի համատեղ նախաձեռնությունն է, որն առաջարկում է ակադեմիական մակարդակի դասընթացներ
LinkedIn Learning։ Հարթակ, որը շատ կիրառելի է պրակտիկ մասնագիտական տեսանկյունից
YouTube։ Ամենամատչելի տարբերակը, որտեղ կարող ես գտնել ամենատարբեր մասնագիտական ուղեցույցներ
Նման հարթակները նաև թույլ են տալիս ստանալ ճանաչված սերտիֆիկատներ, որոնցով հնարավոր է համալրել LinkedIn պրոֆիլը կամ CV-ն։ Այն ընդգծում է շարունակական կրթության քո ձգտումը։
Միկրոուսուցում, երբ գրաֆիկդ խիտ է
Եթե անգամ զբաղվածությունդ թույլ չի տալիս բավարար ժամանակ տրամադրել ինքնազարգացմանը, հիշիր, որ 10 րոպեում ևս հնարավոր է նոր բան սովորել։
Այսպես կոչված միկրոուսուցման ձևաչափն ամենաարդյունավետներից է, քանի որ առաջարկում է 5–15 րոպեանոց ուսումնական նյութեր, որոնք կարելի է լսել կամ դիտել ճանապարհին, ընդմիջման ժամանակ կամ անգամ հերթում սպասելիս։ Ահա մի քանի աղբյուր, որոնցից կարող ես օգտվել․
Այսպիսով սովորելը դառնում է ոչ թե պարտականություն, այլ առօրյայի մաս:
Գործատուի դերը սովորելու մշակույթում
Երկարաժամկետում հաջողում է այն կազմակերպությունը, որը խրախուսում սովորելը է, ոչ թե պահանջում։ Զարգացումը պետք է լինի ոչ միայն անհատական, այլև թիմային արժեք։ Գործատուները կարող են աջակցել՝
- Կազմակերպելով թիմային վերապատրաստումներ՝ հատկապես նոր գործիքների կամ հարթակների վերաբերյալ,
- Տրամադրելով կրթաթոշակներ կամ ուսման ֆինանսավորում,
- Հնարավորություն տալով մասնակցել վեբինարների, սեմինարներ և մասնագիտական կոնֆերանսների,
- Եվ իհարկե, ոգեշնչել սեփական օրինակով։
Աշխարհը փոխվում է անհավանական արագությամբ, և այդ փոփոխությունների մեջ իր տեղը կգտնի նա, ով պատրաստ է սովորել, աճել ու զարգանալ։ Վերապատրաստումն ու որակավորման բարձրացումը պարզապես կարիերայի լրացում չեն, այլ քո ինքնավստահության և նոր հնարավորությունների բանալին։ Սկսի՛ր այսօր, քանի որ այսօրվա փոքրիկ քայլը վաղվա մեծ հաջողության գրավականն է։