Գաղտնիք չէ, որ կնոջ դերը և ներգրավվածությունը ցանկացած ոլորտում շարունակաբար աճում է։ Մայրանալը, անշուշտ, առաջին միտքն է, որ ծագում է, երբ մտածում ես աշխարհում կանանց դերի մասին, բայց անցել են այն ժամանակները, երբ կանանցից ակնկալվում էր ընտրություն կատարել կարիերայի և ընտանիք կազմելու միջև։ Փոխարենը, ժամանակակից մայրերը հմուտ են աշխատանքի և տան պահանջները հավասարակշռելու հարցում՝ հաճախ գերակատարելով սպասելիքները։

Այս անգամ բացահայտում ենք մայրիկների անձնական և աշխատանքային կյանքը ձևավորող բարդ դինամիկան՝ երեխաների վրա ունեցած ազդեցությունից մինչև գործատուների՝ մայրերի նկատմամբ ակնհայտ նախապատվության պատճառները։

Բիզնեսի ճկունության, հեռավար աշխատանքի և թվային տեխնոլոգիաների զարգացման շնորհիվ աշխատող հաջողակ մայր դառնալն այսօր ավելի իրական է, քան երբևէ։ Ահա մի քանի պատճառ մայրանալուց հետո աշխատանքը շարունակելու համար․

Ֆինանսական կայունություն

Բացի ֆինանսապես անկախ լինելուց, մայրիկները կարողանում են ապահովել իրենց ընտանիքի բարեկեցիկ ապագան։

Դրական մոդել երեխայի համար

Երեխաները պետք է հասկանան, որ մայրիկը կարող է լինել նաև մասնագետ, աշխատել և ունենալ հաջողություններ կարիերայում։ Բացի այդ, պետք չէ թերագնահատել աշխատող մայրերի դրական ազդեցությունը երեխաների վրա, բայց այս մասին ավելի ուշ։

Ինքնաբավություն և կայացում

Անձնական նպատակների իրագործումը կբարձրացնի ինքնագնահատականը և կնվազեցնի դեպրեսիայի և սթրեսի հակումը։

Ի՞նչ ազդեցություն ունեն աշխատող մայրիկները երեխաների վրա

Մայրերի դերը երեխաների ձևավորման և զարգացման հարցում, անպատճառ, վճռորոշ է, իսկ մոր կարիերայի ազդեցությունը երեխաների վրա` շատ կարևոր։ Տեսնելով, թե ինչպես են իրենց մայրերը կատարում բազմաթիվ դերեր, երեխաները սովորում են կյանքի անգնահատելի հմտություններ, ինչպիսիք են՝ ժամանակի կառավարումը, հարմարվողականությունը և հաստատակամությունը։ Ավելին, աշխատող մոր հանգամանքը մարտահրավեր է նետում ավանդական գենդերային կարծրատիպերին։

Երեխաների առողջության և մարդկային զարգացման ազգային ինստիտուտի (NICHD) կողմից անցկացված հետազոտությունը, որը տևել է մի քանի տարի և ներգրավել է հազարավոր մասնակիցների, պարզել է, որ մայրերի զբաղվածությունը դրականորեն է ազդում երեխաների ճանաչողական կարողությունների, ներառյալ լեզվական հմտությունների և ակադեմիական նվաճումների, ինքնուրույնության, անկախության և ճկունության վրա։

Հարվարդի համալսարանի հետազոտողները համադրել են բազմաթիվ ուսումնասիրությունների արդյունքներ, ինչը ցույց է տվել, որ մայրերի զբաղվածությունը բացասաբար չի ազդում երեխաների սոցիալական և էմոցիոնալ բարեկեցության վրա՝ ընդգծելով որակյալ խնամքի կենտրոնների և ընտանեկան միջավայրի կարևորությունը։ Մայրիկների աշխատելու և ծնող-երեխա հարաբերությունների վրա անբարենպաստ ազդեցության ապացույցներ չեն գտնվել։

Նման ուսումնասիրությունները ցրում են աշխատող մայրերի շուրջ առասպելներն ու սխալ պատկերացումները։ Այնուամենայնիվ, կարևոր է հասկանալ, որ երեխաների հետ անցկացրած ժամանակի որակն ավելի կարևոր է, քան քանակը։

Ինչո՞ւ են գործատուները սկսել նախապատվություն տալ մայրերին

Գործատուներն ավելի ու ավելի շատ են գիտակցում այն արժեքն ու արդյունքը, որոնք մայրերն են ապահովում։ Իրենց տեխնիկական հմտություններից և որակավորումներից բացի, մայրերը օժտված են բազմաբնույթ առաջադրանքների կատարման, կոնֆլիկտների լուծման հմտություններով, կարեկցանքով, թարմ հեռանկարներով, նորարարական մտածողությամբ և այլն։ Մայրիկները գիտեն՝ ինչպես ճիշտ դասակարգել առաջնահերթությունները, ամեն բան անում են լույսի արագությամբ, այսինքն` իդեալական աշխատակիցներ են յուրաքանչյուր գործատուի համար։

Աշխատող մայրերը ժամանակակից հասարակության աներևակայելի հերոսներն են և մարմնավորում են տոկունություն, վճռականություն և անսահման սեր՝ կարիերայի ձգտումներն ու ընտանեկան պարտականությունները հավասարակշռելու ձգտումով։