Տնօրենների խորհուրդն իրականացնում է Բանկի գործունեության ընդհանուր ղեկավարումը` օրենքով և կանոնադրությամբ Խորհրդի իրավասությանը վերապահված հարցերի սահմաններում (մանրամասն տեղեկատվությունը ներկայացված է Բանկի կանոնադրության մեջ` հայերենով): Տնօրենների խորհրդի անդամները նշանակվում են Բաժնետերերի ընդհանուր ժողովի կողմից: ՀՀ օրենսդրությամբ և Բանկի կանոնադրությամբ սահմանված կարգով` Բանկի տեղաբաշխված բաժնետոմսերի 10 և ավելի տոկոսին տիրապետող բաժնետերերն իրավունք ունեն ընդգրկվել/նշանակվել Տնօրենների խորհրդի կազմում առանց ընտրությունների: Տնօրենների խորհրդի կազմում կարող են ընդգրկվել նաև Խորհրդի անկախ անդամներ:
Խորհրդի անդամների պաշտոնավարման ժամկետը սահմանվում է Բաժնետերերի ընդհանուր ժողովի կողմից, բայց չի կարող 5 տարուց պակաս և 10 տարուց ավել լինել: Տնօրենների խորհրդի նախագահն ու անդամներն ունեն վերընտրվելու իրավունք: Տնօրենների խորհրդի որոշումներն ընդունվում են նիստին ներկա՝ Տնօրենների խորհրդի անդամների ձայների պարզ մեծամասնությամբ, եթե ՀՀ օրենսդրությամբ կամ Բանկի կանոնադրությամբ այլ բան չի պահանջվում: Ընդ որում Տնօրենների խորհրդի որոշումներն իրավաբանական ուժ կունենան, եթե պահպանվել են ՀՀ օրենսդրությամբ, կանոնադրությամբ, Բանկի ներքին իրավական ակտերով և բաժնետերերի պայմանագրով նախատեսված պահանջները:
Գիտակցելով Խորհրդի կազմում բազմազան հմտություններ և գիտելիք ունենալու բոլոր առավելությունները՝ Ամերիաբանկն իր Տնօրենների խորհրդում ընդգրկել է Բանկը հավուր պատշաճի ղեկավարելու համար անհրաժեշտ ամենատարբեր ունակությունները և փորձառությունն ունեցող մարդկանց:
Խորհրդի նոր անդամներ ներգրավելիս՝ հաշվի են առնվում աշխարհագրական բազմազանությունը, բանկային գործի, ակտիվների կառավարման, խորհրդատվության, ֆինանսների և միջազգային բիզնեսի ոլորտներում հարուստ մասնագիտական փորձը: