«Ամերիաբանկ» ՓԲԸ «My  Ameria» համակարգի գաղտնիության քաղաքականություն 

1. Ընդհանուր դրույթներ

1.1. Սույն Գաղտնիության քաղաքականությունը սահմանում է «Ամերիաբանկ» ՓԲԸ (այսուհետ՝ Բանկ) «My Ameria» (Մայ Ամերիա) համակարգի (այսուհետ նաև` համակարգ) միջոցով Հաճախորդի վերաբերյալ տեղեկատվության հավաքագրման և օգտագործման պայմանները:
1.2. «My Ameria» համակարգի միջոցով հաճախորդին հեռահար եղանակով մատուցվում են բանկային ծառայություններ: Բանկային ծառայությունների մատուցման վերաբերյալ տեղեկատվությունը, ինչպես նաև այն հարցերը, որոնք կարգավորված չեն սույն Գաղտնիության քաղաքականությամբ, սահմանվում են «Բանկի կողմից ֆիզիկական անձանց բանկային ծառայությունների մատուցման հիմնական պայմաններով» (11RBD RL 72-01-01) (այսուհետ` Պայմաններ) և «Բանկի սակագներով ֆիզիկական անձ հաճախորդների համար» (11RBD PL 72-01-01):
1.3. «My Ameria» համակարգը Հաճախորդը կարող է օգտագործել ինչպես բջջային հավելվածի միջոցով, այնպես էլ վեբ (web) տարբերակով:
1.4. Սույն Գաղտնիության քաղաքականության իմաստով տեղեկատվություն են համարվում.

     • Հաճախորդի կողմից տրամադրվող տեղեկատվությունը:
     • Ավտոմատ կերպով հավաքագրվող տեղեկատվությունը:

1.5. Հաճախորդի վերաբերյալ տեղեկատվությունը Բանկի կողմից հավաքագրվում, պահպանվում և օգտագործվում է բացառապես «My Ameria» համակարգի տեխնիկական կառավարման, ինչպես նաև համակարգի աշխատանքի վերլուծության և կատարելագործման, մարքեթինգային և սույն Գաղտնիության քաղաքականության մեջ նշված այլ նպատակներով:
1.6. «My Ameria» համակարգին հասանելի են դառնում Հաճախորդի տվյալներն այն պահին, երբ Հաճախորդը բացում է իր անձնական էջը համակարգում` իր կողմից մուտքագրված տվյալների միջոցով:
1.7. «My Ameria» համակարգի աշխատանքի համար կիրառվում է https://mobile.myameria.am բաց URL (Ռեսուրսի միասնական ցուցիչ) հասցեն, որը «My Ameria» համակարգի բաց տիրույթն է` գրանցված Բանկի DNS (Դոմենային անունների համակարգ) գոտում: Բաց հասցեն կիրառվում է «My Ameria» համակարգի և Բանկի միջև անվտանգ հաղորդակցության ապահովման նպատակով և չի ենթադրում Հաճախորդի վերաբերյալ որևէ տվյալի պահպանում կամ տրամադրում:

2. Հաճախորդի կողմից տրամադրվող տեղեկատվություն

2.1. «My Ameria» համակարգի միջոցով ծառայություններ մատուցելիս կարող է հավաքագրվել և պահպանվել Հաճախորդի վերաբերյալ որոշակի տեղեկատվություն, ներառյալ, սակայն չսահմանափակվելով.

     • Հաճախորդի անձնական տվյալները` վերջինիս կողմից «My Ameria» համակարգում անձնական էջ ստեղծելիս (օրինակ` անուն, ազգանուն, էլեկտրոնային փոստի հասցե, հեռախոսահամար, մուտքանուն):
     • Հաճախորդի գործարքների հետ կապված տեղեկություններ (օրինակ` հաշվեհամարները` վճարումներ և փոխանցումներ կատարելու դեպքում, կոմունալ ծառայությունների պայմանագրի տվյալները, վճարման եղանակը, գործարքի գումարային չափ):
     • Բանկի կողմից համապատասխան աջակցություն ստանալու նպատակով համակարգի «Հաղորդագրություններ» բաժնում Հաճախորդի կողմից ուղարկվող տեղեկատվություն:

2.2. «My Ameria» համակարգի միջոցով Հաճախորդին որոշակի ծառայություններ մատուցելու դեպքում, եթե Հաճախորդը ցանկանում է օգտվել տվյալ ծառայությունից, ապա Հաճախորդի կողմից նախապես ստացված համաձայնության հիման վրա Բանկը, միայն տվյալ ծառայության մատուցման շրջանակներում, կարող է ստանալ տեղեկություններ/հասանելիություն Հաճախորդի շարժական սարքում գրանցված կոնտակտային տվյալների (հեռախոսագրքի), շարժական սարքի տեսախցիկի (օրինակ` քարտին փոխանցման դեպքում վճարային քարտը սքանավորելու համար և այլ), ինչպես նաև Հաճախորդի գտնվելու վայրի (կիրառելով GPS կամ նմանատիպ հնարավորություն տվող այլ տեխնոլոգիաներ) վերաբերյալ: Բանկը երաշխավորում է սույն կետում նշված տեղեկատվության գաղտնիության պահպանումը և չտրամադրումը երրորդ անձանց:

3. Ավտոմատ կերպով հավաքագրվող տեղեկատվություն

3.1. «My Ameria» համակարգի միջոցով ծառայություններ մատուցելիս կարող է ավտոմատ կերպով հավաքագրվել և պահպանվել որոշակի տեղեկատվություն, ներառյալ, սակայն չսահմանափակվելով.

     • Հաճախորդի կողմից օգտագործվող շարժական սարքի տեսակը/մոդելը:
     • Հաճախորդի կողմից օգտագործվող շարժական սարքի IP հասցեն:
     • Հաճախորդի կողմից օգտագործվող օպերացիոն համակարգը (օրինակ` iOS, Android, այլ):
     • Հաճախորդի կողմից օգտագործվող շարժական զննարկիչների տեսակը (օրինակ` Google Chrome, Safari, այլ):
     • Տեղեկատվություն այն մասին, թե ինչ եղանակով է Հաճախորդն օգտագործում համակարգը (վեբ տարբերակով կամ հավելվածի միջոցով):

4. Անվտանգության ապահովում

4.1. Կարևորելով «My Ameria» համակարգի միջոցով Հաճախորդի վերաբերյալ ստացված տեղեկատվության գաղտնիության ապահովումը` Բանկը պաշտպանում է Հաճախորդի կողմից տրամադրած, ինչպես նաև Հաճախորդի վերաբերյալ ավտոմատ ստացվող տեղեկատվությունը մի քանի եղանակով, մասնավորապես կիրառում է գաղտնագրման ստանդարտներ և տեղեկատվության պաշտպանության SSL (Secure Socket Layer) արձանագրության տեխնոլոգիա, որպեսզի փոխանցվող տեղեկատվությունը երրորդ անձանց հասանելի չդառնա:
4.2. «My Ameria» համակարգի միջոցով Հաճախորդի վերաբերյալ ստացվող տեղեկատվության անվտանգության ապահովման նպատակով Հաճախորդը համակարգի իր անձնական էջ մուտք գործելիս, համակարգի միջոցով կատարվող գործարքները հաստատելիս, ինչպես նաև համակարգով կատարվող բոլոր այն գործողությունների համար, որոնք կարող են պարունակել Հաճախորդի անձնական տվյալները, մուտքագրում է իր PIN կոդը կամ անցնում է բիոմետրիկ նույնականացում (Face ID, Finger Touch ID):
4.3. Հաճախորդը պարտավոր է ապահովել «My Ameria» համակարգ մուտք գործելու համար անհրաժեշտ տեղեկությունների գաղտնիությունը կամ երրորդ անձանց որևէ կերպ հայտնի չդարձնել համակարգ մուտք գործելու և օգտագործման համար կիրառվող մուտքանունները, գաղտնաբառերը, կոդերը և այլ տվյալները, կամ բացառել այնպիսի գործողությունների իրականացումը, որոնք կարող են հանգեցնել այդպիսի տվյալները երրորդ անձանց հայտնի դառնալուն:
4.4. Անվտանգության նկատառումներից ելնելով` Բանկը կարող է իրականացել Հաճախորդի կողմից օգտագործվող շարժական սարքի օպերացիոն համակարգին Հաճախորդի ադմինիստրատիվ հասանելիության ստուգում: Հասանելիության առկայության դեպքում Բանկը կարող է սահմանափակել Հաճախորդի մուտքը «My Ameria» համակարգ, քանի որ այն ենթադրում է օպերացիոն համակարգի հիմնական կարգավորումների խմբագրման հնարավորություն, ինչը օպերացիոն համակարգը դարձնում է խոցելի և կարող է վտանգ ներկայացնել «My Ameria» համակարգի օգտագործման և համակարգում առկա տվյալների համար: Բանկը երաշխավորում է սույն կետում նշված ստուգման արդյունքում ստացվող տեղեկատվության գաղտնիության պահպանումը և չտրամադրումը երրորդ անձանց:

5. Այլ պայմաններ

5.1. Օգտվելով «My Ameria» համակարգից` Հաճախորդն ընդունում է սույն Գաղտնիության քաղաքականությամբ սահմանված պայմանները և տալիս իր համաձայնությունը` սույն Գաղտնիության քաղաքականությամբ սահմանված նպատակներով Հաճախորդի վերաբերյալ տեղեկատվությունը հավաքագրելու և օգտագործելու համար:
5.2. ՀՀ օրենսդրությամբ նախատեսած իրավական հիմքերի առկայության դեպքում Հաճախորդի` Բանկին տրամադրված անձնական տվյալների ուղղման, ոչնչացման և/կամ մշակման դադարեցման վերաբերյալ Հաճախորդի գրավոր դիմումը Բանկի կողմից դիտարկվում և ընթացք է տրվում ՀՀ օրենսդրությամբ և/կամ Բանկի ներքին իրավական ակտերով սահմանված կարգով և ժամկետներում:
5.3. Սույն Գաղտնիության քաղաքականության փոփոխությունները Բանկը հասանելի է դարձնում Հաճախորդին իր պաշտոնական ինտերնետային կայքում ` դրանց ուժի մեջ մտնելուց ոչ ուշ, քան 7 (յոթ) աշխատանքային օր առաջ (կամ ավելի ուշ, եթե դա թույլատրվում է ՀՀ օրենսդրությամբ, սակայն ոչ ուշ, քան դրանց ուժի մեջ մտնելը), եթե ավելի խիստ պահանջ նախատեսված չէ ՀՀ օրենսդրությամբ: Եթե մինչև փոփոխությունների ուժի մեջ մտնելու համար սահմանված ժամկետը Հաճախորդը գրավոր չի տեղեկացնում Բանկին` սույն Գաղտնիության քաղաքականության ներքո «My Ameria» համակարգի օգտագործումից հրաժարվելու մասին, այդ փոփոխությունները համարվում են ընդունված (ակցեպտավորված) Հաճախորդի կողմից: