Հեղինակավոր Moody's միջազգային վարկանշային գործակալությունն Ամերիաբանկին շնորհել է հետևյալ վարկանիշները.
- ազգային արժույթով երկարաժամկետ ավանդների B1 վարկանիշ,
- արտարժույթով երկարաժամկետ ավանդների B2 վարկանիշ,
- կոնտրագենտի ռիսկի երկարաժամկետ Ba3 վարկանիշ:
Ազգային արժույթով երկարաժամկետ ավանդների B1 վարկանիշն ունի դրական հեռանկար՝ հիմնված պետական պարտքի B1 վարկանիշի դրական հեռանկարի վրա:
Արտարժույթով երկարաժամկետ ավանդների B2 վարկանիշը հայկական բանկերի համար առավելագույն հնարավոր վարկանիշն է` սահմանափակված է Հայաստանի Հանրապետության արտարժույթով ավանդների առավելագույն շեմով: Վարկանիշն ունի կայուն հեռանկար:
Վարկանշման հիմնավորումները
Ամերիաբանկին շնորհված ազգային արժույթով երկարաժամկետ ավանդների վարկանիշն արտացոլում է.
- բանկի դիվերսիֆիկացված բիզնես ուղղությունները և ամուր դիրքերը տեղական շուկայում
- ակտիվների բարելավված որակը և հնարավոր կորուստների կլանման կարողությունը` շնորհիվ կապիտալի պատշաճ բուֆերների, բարձր շահութաբերության և խնդրահարույց վարկերի բավարար ծածկույթի,
- իրացվելիության բավարար մակարդակը և միջոցների ներգրավման դիվերսիֆիկացված աղբյուրները: Միաժամանակ, Ամերիաբանկի վարկանիշը սահմանափակված է Հայաստանի մակրոտնտեսական ցուցանիշներով և արտարժույթով վարկերի էական տեսակարար կշռով:
Ըստ Moody's-ի՝ Ամերիաբանկի ակտիվների որակը կանխատեսելի ապագայում ընդհանուր առմամբ կայուն կմնա՝ հաշվի առնելով տնտեսական պայմանների բարելավումն ու Moody's-ի սպասումները, որ 2018-2019թթ. ազգային արժույթը կլինի կայուն:
Վարկանիշները սահմանելիս` Moody's-ը հիմք է ընդունել մի շարք կարևոր ցուցանիշներ: Մասնավորապես, նվազել է չաշխատող վարկերի տեսակարար կշիռն ընդհանուր վարկային պորտֆելում: 31.03.2018 դրությամբ այդ ցուցանիշը կազմել է 3.9%՝ 2017թ. տարեվերջի 4.1%-ի համեմատ, խնդրահարույց վարկերի ծածկման գործակիցը 2018թ. առաջին եռամսյակում կազմել է 87%՝ 2017թ. տարեվերջի 57%-ի համեմատ: Միաժամանակ, տարեվերջին արտարժութային վարկերի տեսակարար կշիռը եղել է բարձր՝ 82%, ինչը բերում է ակտիվների որակի զգայունությանը փոխարժեքային տատանումների նկատմամբ: Սակայն մյուս կողմից, այդ վարկառուների էական մասն արտահանողներ են, որոնք ապահովում են արտարժութային հասույթ, որն էլ մասամբ նվազեցնում է փոխարժեքային տատանումներից բխող վարկային ռիսկը:
Moody's-ը կարևորել է նաև այն համգամանքը, որ Ամերիաբանկն ունի դիվերսիֆիկացված բաժնետիրական կառուցվածք և անհրաժեշտության դեպքում կարող է ներգրավել լրացուցիչ կապիտալ: Մասնավորապես, Ասիական Զարգացման Բանկի ներդրման շնորհիվ 2018 թ. Բանկի սեփական կապիտալը համալրվել է 30 միլիոն ԱՄՆ դոլարով: Կապիտալի համարժեքության նորմատիվային ցուցանիշը 2018թ. առաջին եռամսյակում կազմել է 14.05%, իսկ Բազել I-ի պահանջներին համապատասխան՝ շուրջ 19%: 2018թ. առաջին եռամսյակում բանկի զուտ շահույթը կազմել է 2.56 մլրդ ՀՀ դրամ (56% աճ՝ 2017թ. նույն ժամանակահատվածի համեմատ): Արդյունքում` ակտիվների միջին եկամտաբերությունը տարեկան կտրվածքով կազմել է 1.5%, եկամտաբերությունն ըստ կապիտալի ՝ 13.4%:
Moody's-ն ակնկալում է, որ կանխատեսելի ապագայում` մոտակա 12-18 ամսում Բանկի եկամտաբերության աճի միտումը կպահպանվի՝ շնորհիվ այն բանի, որ Բանկի վարկային ռազմավարությունը կենտրոնացած կլինի ավելի եկամտաբեր մանրածախ բանկային գործառնությունների զարգացման վրա:
Moody's-ը նշել է նաև, որ Բանկի իրացվելիության ցուցանիշները և միջոցների նեգրավումը մոտակա 12-18 ամսում կլինեն կայուն՝ շնորհիվ լավ դիվերսիֆիկացված պարտավորությունների, իրացվելի ակտիվների մեծ պաշարի և այլընտրանքային իրացվելիության աղբյուրների (օրինակ՝ միջազգային ֆինանսական կազմակերպություններից ստացվող միջոցների): Moody's-ը կարևորում է նաև, որ հաճախորդների միջոցները Բանկի պարտավորությունների շուրջ 64% են, որոնց կեսը մանրածախ ավանդներ են: Բանկն ունի իրացվելիության բավարար պաշար՝ կազմված դրամական միջոցներից և պետական արժեթղթերից, որոնք 2018թ. առաջին եռամսյակում կազմել են ընդհանուր ակտիվների ավելի քան 22%-ը:
Ամերիաբանկի ազգային արժույթով երկարաժամկետ ավանդների գլոբալ B1 վարկանիշը (GLC) ներառում է Moody's-ի գնահատականն առ այն, որ անհրաժեշտության դեպքում պետական աջակցության հավանականությունը բարձր է՝ շնորհիվ այն հանգամանքի, որ Ամերիաբանկը հանդիսանում է համակարգային կարևորության բանկ, ունի հաճախորդների մեծ բազա և շուկայի մեծ մասնաբաժին (17% ըստ հաճախորդներին տված վակերի, 13% ըստ հաճախորդների ավանդների): Մյուս կողմից, այս աջակցությունն ազգային արժույթով գլոբալ վարկանիշի բարձրացում չի ենթադրում, քանի որ բանկի վարկունակության բազային գնահատականն (BCA) արդեն իսկ հավասար է Հայաստանի B1 վարկանիշին:
Վարկանիշի դրական հեռանկար
Բանկի ազգային արժույթով երկարաժամկետ ավանդների B1 վարկանիշն ունի դրական հեռանկար, ինչը համընկնում է ՀՀ պետական պարտքի B1 վարկանիշի դրական հեռանկարի հետ: