Ամերիաբանկը «Financial Times» հեղինակավոր ընկերության` «The Banker»  ամսագրի կողմից արժանացել  է  Հայաստանի 2020թ. «Տարվա լավագույն բանկ» մրցանակին: Բանկային գործունեության գնահատման ամենաբարձր չափանիշ համարվող այս մրցանակը Ամերիաբանկին տրվում է 7-րդ անգամ:   

Լոնդոնում կայացած մրցանակաբաշխության ընթացքում մրցույթի կազմակերպիչները նշեցին, որ Ամերիաբանկը հաղթող է ճանաչվել մի շարք ուղղություններով գրանցած տպավորիչ առաջընթացի, ձեռքբերումների և նորարարական մոտեցումների համար. «Մեր թիմը մի քանի ամիս շարունակ բանկերի շրջանում իրականացնում էր հետազոտություններ` կարևորելով  արդյունավետության հիմնական ցուցանիշների, զարգացման ռազմավարության և հաճախորդների սպասարկման բարելավման ուղղությամբ կատարված քայլերը: Ամերիաբանկը Հայաստանում տարվա լավագույն բանկ անվանակարգի ակնհայտ հաղթողն է ուսումնասիրվող ժամանակահատվածում գրանցած կայուն աճի, ծառայությունների թվայնացման ոլորտում կատարված էական քայլերի և իր հաճախորդների համար բանկային նոր ու ժամանակակից գործիքներ ներդնելու շնորհիվ»: 

Ըստ ամսագրի` ընթացիկ տարում Ամերիաբանկն էական  ներդրում է ունեցել Հայաստանում փոքր և միջին ձեռնարկություններին աջակցելու գործում:  Առանձնակի կարևորվել է Բանկի կողմից օնլայն վարկերի տրամադրման գործընթացը, որը փոքր և միջին ձեռնարկություններին հնարավորություն է ընձեռում վարկի օնլայն հայտ ներկայացնել և ստանալ պատասխանը հաշված րոպեների ընթացքում` ի շնորհիվ ներդրված սքորինգային համակարգի: «The Banker» ամսագրի կողմից նշվել է նաև, որ Ամերիաբանկի հիփոթեքային և ավտովարկավորման առցանց հարթակները նույնպես նորարարական լուծումներ են, որոնք ուղղված են հաճախորդների հարմարավետությանը, և հնարավորություններ են ստեղծում` իրագործելու բիզնես նպատակներն արդյունավետ կերպով: 
 
Նշենք, որ «The Banker» ամսագրի մրցանակաբաշխությունը   լավագույն ֆինանսական կառույցների գործունեության արդյունքների գնահատման ամենահեղինակավոր չափանիշն է աշխարհում: Յուրաքանչյուր տարի մրցույթին մասնակցում են աշխարհի ավելի քան  100 երկրների  բանկեր:

Մրցանակաբաշխության պաշտոնական արարողությունը կարող եք դիտել այստեղ: