YouTube-ը վաղուց պարզապես ժամանցային հարթակ չէ։ Այն դարձել է կրթության, բիզնեսի և եկամուտ ստեղծելու իրական գործիք։

Ավելին, հետազոտությունները ցույց են տալիս, որ դիտողների ավելի քան 70%-ը YouTube-ում տեսած բովանդակության շնորհիվ ավելի լավ է ճանաչում նոր բրենդներ և ծառայություններ։ Սա նշանակում է, որ որակյալ կոնտենտ ստեղծողները կարող են ոչ միայն լսարան հավաքել, այլ նաև իրական արժեք ստեղծել։ 

Հայաստանյան բովանդակություն ստեղծողները YouTube-ի մոնետիզացիայից (այս մասին արդեն պատմել ենք մեր այս բլոգում)  օգտվելու համար ստիպված էին օգտվել միջնորդ կազմակերպություններից կամ ալիքները գրանցել այլ երկրներում: Վերջերս տեղի ունեցավ մի կարևոր փոփոխություն, որը բարելավել է իրավիճակը. YouTube Partner Program-ն արդեն հասանելի է նաև  Հայաստանում։

Սա նոր հնարավորություն է վիդեոբլոգինգը սիրելի հոբբիից եկամուտի աղբյուրի վերածելու համար։

Մոնետիզացիայի միացման հիմնական պայմանները

YouTube Partner Program-ին միանալու համար ալիքը պետք է բավարարի մի քանի հիմանական չափանիշների.

1. Առնվազն 1000 բաժանորդ (Subscribers)

2. Վերջին 12 ամսում երկար տեսանյութերի առնվազն 4000 ժամ դիտում կամ վերջին 90 օրում Shorts ձևաչափով` 10 միլիոն դիտում

3. Ալիքը պետք է համապատասխանի YouTube-ի համայնքային կանոններին և ունենա ակտիվացված երկքայլ հաստատում (2-Step Verification)

Ինչպե՞ս ստանալ վճարումներ YouTube-ից

YouTube-ից փոխանցումները կատարվում են AdSense համակարգի միջոցով։

Վճարումներ ստանալու համար անհրաժեշտ է.

1. YouTube Studio-ից կապել ալիքը AdSense հաշվին. այն կարող ես գտնել YouTube Studio-ի վերևի ձախ անկյունում` Earn բաժնում:

2. Հաստատել քո ինքնությունը. քո ֆիզիկական հասցեն հաստատելու համար Google-ը փոստով կուղարկի PIN կոդ:

3. Ավելացնել բանկային տվյալները. որպես վճարման եղանակ սովորաբար օգտագործվում է միջազգային փոխանցման տարբերակը (Wire Transfer)։ Դրա համար անհրաժեշտ է տրամադրել բանկի SWIFT կոդը և քո հաշվեհամարը:

Լայֆհաք. օգտագործիր դոլարային հաշիվ, որպեսզի խուսափես արժույթի փոխանակման ընթացքում առաջացող հավելյալ ծախսերից։

Այս քայլերը, պահանջներն ու պայմաններն ավելի մանրամասն նկարագրված են Steps to getting paid և AdSense for YouTube ուղեցույցներում։

Ինչպե՞ս օրինականացնել եկամուտը Հայաստանում

Ձեռնարկատիրական գործունեություն իրականցնելու համար անհրաժեշտ է հաշվառվել պետական ռեգիստրում՝ որպես անհատ ձեռնարկատեր (ԱՁ) կամ կազմակերպություն: Այդպիսով դու օրինական ձևով կհայտարարագրես քո եկամուտները և կխուսափես հարկային խնդիրներից։

⚠️ Քանի որ հարկային օրենսդրությունը կարող է փոփոխվել, խորհուրդ ենք տալիս խորհրդակցել հաշվապահի կամ հարկային մասնագետի հետ։

Ի՞նչն է ազդում ցուցանիշների վրա

YouTube-ում եկամուտը մեծապես կախված է CPM-ից (Cost Per Mille)՝ այն գումարից, որը գովազդատուները վճարում են 1000 գովազդային դիտման համար։

CPM-ի վրա ազդում է մի քանի կարևոր գործոն.

• Լսարանի աշխարհագրությունը (GEO)
  ԱՄՆ-ի և եվրոպական երկրների լսարանի համար գովազդի արժեքը սովորաբար ավելի բարձր է։
• Լսարանի տարիքային խումբը
  Ավելի վճարունակ լսարան ունեցող ալիքները սովորաբար ունեն ավելի բարձր CPM։
• Սեզոնայնությունը
  Տարեվերջին գովազդային բյուջեները մեծանում են, ինչի պատճառով CPM-ը նույնպես աճում է։
• Տեսանյութի տևողությունը
  8 րոպեից ավելի տեսանյութերում հնարավոր է տեղադրել միջանկյալ գովազդներ (mid-roll ads), ինչը կարող է մեծացնել եկամուտը։
   

Ո՞ր թեմաներն են առավել եկամտաբեր

Որոշ թեմաներ ավելի բարձր CPM ունեն, քանի որ դրանց շուրջ մեծ գովազդային պահանջարկ կա։

Ամենաեկամտաբեր համարվող թեմաներից են.

• անձնական ֆինանսներ և ներդրումներ,
• տեխնոլոգիաներ և ծրագրային ապահովում,
• կրթություն և օնլայն ուսուցում,
• թվային մարքեթինգ,
• առցանց եկամուտների ստեղծում,
• առողջություն և բարեկեցություն:

Այս ոլորտներում գովազդատուները սովորաբար ավելի մեծ բյուջե են հատկացնում, ինչը կարող է բարձրացնել քո եկամուտը։

Ինչպե՞ս չձախողել

Եթե նոր ես սկսում YouTube ալիք վարել, կարևոր է ուշադրություն դարձնել մի քանի սկզբունքների.

Ընտրիր հստակ թեմա (niche)
Մի փորձիր խոսել ամեն ինչից․ կենտրոնացիր մեկ ոլորտի վրա և ձևավորիր քո հստակ լսարանը։

Պահպանիր հեղինակային իրավունքները
Օգտագործիր միայն թույլատրելի երաժշտություն և տեսանյութեր։

Կառուցիր հետևողական կոնտենտի ռազմավարություն.
Կանոնավոր հրապարակումները օգնում են ալիքին աճել և հասնել մոնետիզացիայի պահանջներին։

Եթե ունես հետաքրքիր գաղափարներ, գիտելիք կամ փորձ, որը կարող է օգտակար լինել ուրիշներին, YouTube-ը կարող է դառնալ այն հարթակը, որտեղ քո սիրելի գործը վերածվում է եկամուտի աղբյուրի։