Ամառն անցնում է, իսկ դու դեռ երազում ես ծովափի, արևի ու հանգստի մասի՞ն։ Մի կողմից՝ մտքումդ արևն ու պինա-կոլադան են, մյուս կողմից՝ մտքերն այն մասին, թե քո բացակայության ընթացքում ինչ կկատարվի քո բիզնեսի հետ։
Բարեբախտաբար կան պարզ քայլեր, որոնք կօգնեն ապահովել բիզնես գործընթացների անխափանությունը, մինչ դու վայելում ես հանգիստդ:
1. Նախապես պլանավորիր բիզնես գործընթացները
Արձակուրդից առաջ մի քանի օր տրամադրիր «նախապատրաստական փուլ» կոչվածի համար։
- Պատրաստիր ընթացիկ և սպասվող գործերի ցուցակ,
- Նշիր առաջնահերթությունները, որոնք պետք է անել մինչև արձակուրդի մեկնելը,
- Բաշխիր պարտականությունները թիմի ներսում կամ գործընկերների միջև։
Օգտագործիր 
Trello, 
Asana կամ 
Monday.com, որպեսզի ոչ միայն բաժանես գործերը, այլև վերահսկես դրանց կատարման ընթացքը։
2. Կարևոր հանձնարարությունները տուր թիմի վստահելի անդամներին
Քո բացակայության ընթացքում որոշումներ կայացնելու լիազորությունները տուր թիմի այն անդամներին, որոնք ունեն բավարար փորձ և պատրաստ են ստանձնել պատասխանատվություն։ Սա ոչ միայն կօգնի խուսափել ձգձգումներից, այլև թիմում կխթանի պատասխանատվության և փոխվստահության մշակույթը։
3. Ավտոմատացրու առօրյա բիզնես գործընթացները
Համակարգված գործելակերպը սկսվում է ավտոմատացումից։ Օգտագործիր գործիքներ, որոնք կօգնեն հաշիվ-ապրանքագրերը, հաշվետվությունները և հաճախորդների հետ հաղորդակցությունը կազմակերպել առանց քո անմիջական մասնակցության։ Սա ժամանակ է խնայում և նվազեցնում է մարդկային սխալի հավանականությունը։
Մի քանի օգտակար գործիք՝
Zoho Books կամ 
QuickBooks – հաշիվ-ապրանքագրերի և ֆինանսական հաշվետվությունների կառավարման համար։
Slack կամ 
Microsoft Teams – թիմային հաղորդակցությունն ու ֆայլերի փոխանակումը մեկ հարթակում կազմակերպելու համար։- Asana կամ Trello – առաջադրանքների և նախագծերի կառավարում հստակ ժամկետներով։
Zapier – տարբեր գործիքների միջև ավտոմատացված կապ ստեղծելու համար (օրինակ՝ էլ․ փոստից CRM փոխանցում):
HubSpot, Zoho CRM - CRM համակարգեր հաճախորդների տվյալների կառավարման համար։
Բացի նախագծերի ու թիմային հաղորդակցության գործիքներից, հիշիր նաև ֆինանսական հարմարավետության մասին։ Մոբայլ բանկինգի գործիքները թույլ են տալիս ցանկացած պահի հետևել հաշվարկներին, կատարել փոխանցումներ և վերահսկել ծախսերը ցանկացած տեղից, ցանկացած պահի։
4. Սահմանիր «offline» ժամեր և հաղորդակցման հստակ ուղեցույց
Հանգստի իմաստը հենց հանգստանալն է։ Եթե արձակուրդում 24/7 «կապի մեջ» ես, ապա հուզական այրումն ու գերհոգնածությունը երաշխավորված են։ Որպեսզի խուսափես ավելորդ սթրեսից, նախապես տեղեկացրու բոլորին, որ արձակուրդում ես լինելու: Սահմանիր՝ երբ և ինչ դեպքերում թիմը կարող է կապվել քեզ հետ։ Օրինակ՝ նշիր արտակարգ իրավիճակների շեմը և հաղորդակցման նախընտրելի ձևը (էլ․ փոստ, մեսենջեր և այլն)։
Օգտակար հնարք – WhatsApp կամ Telegram-ում կարող ես օգտագործել բոտեր` ավտոմատ պատասխաններ, եթե հաճախորդները սովոր են քեզ այնտեղ գրել։
Օգտակար հիշեցում – լավ ղեկավար լինելը նաև նշանակում է վստահել թիմին, ոչ թե ամեն ինչ վերահսկել։
5. Պատրաստիր արտակարգ իրավիճակների պլան
Հնարավոր ռիսկեր միշտ կան։ Մի մոռացիր կանխատեսել հնարավոր խոչընդոտները և նախապես պատրաստել դրանց լուծման տարբերակները։ Կազմիր գործողությունների ճկուն պլան տարբեր սցենարների համար՝ սկսած տեխնիկական խափանումներից մինչև հաճախորդների անսպասելի պահանջներ։ Պարզ, բայց հստակ քայլերով արտակարգ պլանը կօգնի արագ լուծել ցանկացած խնդիր առանց քո միջամտության։
6. Վերանայիր և բարելավիր բիզնես գործընթացները
Վերադառնալուց հետո գնահատիր արձակուրդի ընթացքում իրականացված աշխատանքը։ Վերլուծիր, թե ինչն է լավ աշխատել, ինչ խնդիրներ են առաջացել և ինչպես կարելի է բարելավել գործընթացները։ Սա քո բիզնեսն ավելի արդյունավետ դարձնելու լավագույն հնարավորությունն է։
Վերջապես, հանգիստը ներդրում է քո առողջության, էներգիայի և աշխատանքային արդյունավետության մեջ։ Եթե պլանավորես, վստահես մարդկանց ու ընտրես ճիշտ գործիքներ, կարող ես վայելել հանգիստդ` առանց մտահոգվելու աշխատանքի մասին։