Յուրաքանչյուրս էլ գոնե մի պահ մտածել է` արդյոք փողը կարող է ավելի երջանիկ դարձնել: Այսօր առաջարկում ենք հարցին նայել այլ կողմից․ իսկ եթե խոսքը ոչ թե այն մասին է, թե որքան ես ծախսում, այլ այն, թե ինչպես ես ծախսում:

Այսօր պատմում ենք այն մասին, թե ինչպես ծախսել գումարը՝ կյանքն ավելի գունեղ դարձնելու համար:
 

• Գնիր փորձառություն

Մի շարք հետազոտություններ փաստում են, որ փորձառության վրա ծախսելը մեզ ավելի երջանիկ է դարձնում, քան նյութական գնումները։ Ինչո՞ւ։ Քանի որ փորձառությունը մնում է մեզ հետ, դառնում փորձ, պատմություն և հիշողություն: Դոկտոր Թոմաս Գիլովիչի թիմը հետազոտության արդյունքում պարզեց, որ փորձառություններից, օրինակ, ճամփորդություններից ստացված զգացողություններն ավելի երկար են տևում` դառնալով իմաստալից հիշողություններ և անձնական ինքնության մաս: Ի հակադրություն նյութական բարիքների, որոնց դեպքում բավարարվածության զգացումն արագորեն մարում է, քանի որ մարդիկ արագ ընտելանում են իրերին:

• Արժեք ստեղծիր

Էլիզաբեթ Դանն իր հետազոտություններից մեկի շրջանակում խնդրում էր մարդկանց կատարել «սոցիալական ծախսեր», իսկ հետո «չափում»  նրանց երջանկությունը: Արդյունքում պարզ է դարձել, որ մարդիկ ավելի երկարատև երջանկություն են ապրում, երբ բարիք են ստեղծում։

Այս դեպքում ակտիվանում են ուղեղի այն հատվածները, որոնք կապված են պարգևատրման և կարեկցանքի հետ՝ խթանելով սոցիալական կապի, երախտագիտության և ինքնաբավության զգացումը:

• Առատաձեռն եղիր

Երբևէ նկատե՞լ ես այն փոքրիկ փայլը, որը ստանում ես մտերիմներիդ համար նվեր գնելուց հետո: Նվիրելը բերում է երջանկության մի ալիք։ Բրիտանական Կոլումբիայի համալսարանի ուսումնասիրությունները ցույց են տալիս, որ այլ մարդկանց երջանկացնելիս ակտիվանում են ուղեղի «երջանիկ գոտիները»:
 

• Նպատակային ծախսեր արա

Համաձայն Բրիտանական սոցիալական հոգեբանության ամսագրում հրապարակված հետազոտության՝ գնումների համապատասխանությունը նպատակներին ևս առանցքային է գումար-երջանկություն փոխհարաբերություններում:

Հետազոտության ընթացքում 452 մասնակցի խնդրել են գրել, թե նրանք ինչ ծախսեր են արել վերջին երեք ամսվա ընթացքում (60-ից մինչև 1200 դոլար)՝ բացառելով ամենօրյա ծախսերը: Հետո խնդրել են նշել, թե որքան է գնումն օգնել նրանց տարբեր նպատակների իրականացմանը, նպաստել երջանկությանը և գոհունակությանը:

Հետազոտության արդյունքում պարզվեց՝ որքան ավելի շատ է գնումն արտացոլում մարդկանց նպատակները, այնքան ավելի է բարելավվում  նրանց կյանքի որակը: Այլ կերպ ասած, ամենամեծ բավարարվածություն բերում են այն ծախսերը, որոնք կապված են նպատակների իրականացման հետ։

Երբ ձեռք ես բերում փորձառություն, հավատարիմ ես քո արժեքներին, իրականացնում ես նպատակներդ և կիսվում ես դիմացինի հետ, կյանքդ ավելի հարուստ, գունեղ և պայծառ ես դարձնում: