Պատկերացրու` արթնանում ես, պատուհանից նայում Սագրադա Ֆամիլիա տաճարին, պատրաստվում, վերցնում սուրճ և չուռռոս ու շտապում դասի։
Շատ ֆիլմեր հենց այսպես էլ սկսվում են, ու այս ամենը շատ իրատեսական է: Հնարավորությունները մի քիչ ուսումնասիրելու դեպքում ինքդ էլ կհամոզվես, որ այսպիսի դրվագով քո օրերն էլ կարող են սկսվել:
Գործդ հեշտացնելու համար այսօր առանձնացրել ենք լավագույն ծրագրերը, որոնք կօգնեն քեզ ուսումնական նպատակներիդ հասնելու ճանապարհին:
Erasmus+
Էրազմուսը ուսանողների փոխանակման թերևս ամենահայտնի ծրագրերից է, որը ունի հնարավորությունների լայն շրջանակ: Այն ԵՄ ծրագիր է, որն առաջարկում է բակալավրիատի, մագիստրատուրայի և դոկտորանտուրայի մակարդակներում ուսանողական փոխանակումներ եվրոպական բուհերում։ ԵՄ-ն նաև տրամադրում է մինչև 1,500 եվրո ճանապարհորդության և ամսական 800-900 եվրո՝ կեցության ծախսերը հոգալու համար: Հաշվի առ, որ «Էրազմուս»-ի փոխանակման ծրագրին մասնակցելը ենթադրում է ուսուցման լեզվով դասախոսությունների ունկնդրում, անհատական գրավոր աշխատանքների պատրաստում և քննությունների հանձնում:
Որոշ դասընթացներ կազմակերպում են անգլերենով, շատերը՝ հյուրընկալող երկրի լեզվով։ Ուստի կախված այն երկրից, որտեղ սովորելու ես, անհրաժեշտ է ունենալ համապատասխան լեզվի բավարար մակարդակ: Որպես ևս մեկ առավելություն նշենք, որ ավարտելուց՝ հետո մեկ տարվա ընթացքում, Էրազմուսն աջակցում է շրջանավարտների աշխատանքի տեղավորմանը և պրակտիկային:
FLEX
Future Leaders Exchange (ապագա առաջնորդների փոխանակման) ծրագիրն իրականացվում է Ամերիկյան խորհուրդներ կազմակերպության կողմից։ Մրցույթը հաղթող 9-12-րդ դասարանի դպրոցականները կարող են մեկ տարի անվճար սովորել ԱՄՆ ավագ դպրոցներում` ապրելով ամերիկյան հյուրընկալ ընտանիքներում: Ստացվում է, որ մշակութային փոխանակում տեղի է ունենում նաև հյուրընկալող ընտանիքում: Ծրագրին դիմելու համար անհրաժեշտ է անցնել մի քանի փուլ, որոնցից առաջինը թեստն է: Մյուս փուլերը ներառում են շարադրություններ, ELTIS թեստ, խմբային աշխատանքներ և հարցազրույցներ:
DAAD
DAAD-ն ակադեմիական փոխանակման ծրագիր է, որը թույլ է տալիս այլ երկրների ուսանողներին և գիտնականներին ֆինանսավորում ստանալ Գերմանիայում սովորելու համար: DAAD-ի շրջանակում գործում են մի շարք կրթաթոշակային ծրագրեր: Ամսական կրթաթոշակը տատանվում է՝ կախված ծրագրից, և կազմում է ամսական 850-1200 եվրո: Քանի որ Գերմանիայի պետական բուհերում կրթությունն անվճար է կամ պահանջում է միայն չնչին վճարում, այս գումարը թույլ է տալիս ծածկել բոլոր հիմնական ծախսերը: Ծրագիրը հնարավորություն է տալիս մինչ մեկնելը ստանալու գերմաներենի առաջնային գիտելիքներ, իսկ լեզվական հմտությունների հետագա զարգացումը, բնականաբար, տեղի է ունենում տվյալ միջավայրում ապրելու արդյունքում:
Իմ Հայաստան, իմ ապագա
Սա Ամերիաբանկի և VISA-ի համատեղ մրցույթն է Հայաստանի պետական և մասնավոր բուհերի բոլոր ուսանողների համար։
Այս նախագիծն ունի երեք կոմպոնենտ՝ կրթաթոշակ 160 ուսանողի, նախագծերի ֆինանսավորում և աշխարհի լավագույն բուհերից մեկում ուսանողական կարճաժամկետ ծրագրի մասնակցելու հնարավորություն:
Կրթաթոշակի մրցույթին մասնակցելու համար անհրաժեշտ է հավաքել ամենաբարձր միավորներն ըստ հետևյալ երկու չափանիշների` թեստի արդյունքներ և 2023-2024 ուս․ տարվա միջին ՄՈԳ։
Նախագծի ֆինանսավորում ստանալու և/կամ աշխարհի լավագույն բուհերից մեկի ծրագրին մասնակցելու համար անհրաժեշտ է հավաքել ամենաբարձր միավորները և՛ թեստից, և՛ նախագծերի գնահատումից:
Եթե նախագիծը հետաքրքրեց քեզ, անպայման փորձիր:
Նշենք, որ ուսանողները կրթաթոշակը ստանալու են իրենց Visa Student քարտին:
