«Կարո՞ղ եմ արդյոք հաշիվ բացել ու քարտ պատվիրել երեխայիս համար». այս հարցը մենք շատ հաճախ ենք ստանում: Այսօր մեր բլոգը նվիրված է անչափահասների համար հաշվի բացման պայմաններին և առանձնահատկություններին։
Ի՞նչ է պետք հաշիվ բացելու համար
Մինչև 14 տարեկան անձանց (փոքրահասակների) համար հաշիվ բացելիս անհրաժեշտ է երկու ծնողների կամ ըստ դեպքի` այլ օրինական ներկայացուցիչ/ների/ գրավոր համաձայնությունը, որոնք երեխայի անունից պետք է ստորագրեն անհրաժեշտ բոլոր փաստաթղթերը։
Իսկ 14-18 տարեկան անձանց (անչափահասների) անունով հաշվի բացման համար բավական է ծնողներից մեկի համաձայնությունը։
Ե՞րբ կարող է տրամադրվել քարտը
Բանկային քարտ կարելի է ունենալ` սկսած 14 տարեկանից։ Արդեն հաշվետեր լինելու դեպքում քարտ կարելի է պատվիրել ինքնուրույն՝ MyAmeria հավելվածի միջոցով։
Ո՞վ է կառավարելու հաշիվները
Մինչև 14 տարեկան անչափահաս անձի անունով բանկային հաշիվը բացվում և տնօրինվում է անչափահաս անձի օրինական ներկայացուցիչների կողմից, իսկ անչափահաս անձի 14 տարին լրանալուց հետո օրինական ներկայացուցչի գրավոր համաձայնությամբ հաշիվը կարող է տնօրինվել անչափահաս անձի կողմից ինքնուրույն:
14-18 տարեկան անչափահաս անձը օրենքով նախատեսված դեպքերում և/կամ օրինական ներկայացուցչի գրավոր համաձայնությամբ կարող է Ամերիաբանկում ինքնուրույն բացել բանկային հաշիվներ և ինքնուրույն տնօրինել դրանցում առկա միջոցները:
Եթե 16 տարին լրացած անձը ճանաչվել է գործունակ, ապա կարող է սեփական նախաձեռնությամբ գործարքներ կատարել և դրանց համար կրում է ամբողջական պատասխանատվություն։
Արդյոք կա՞ն անչափահասների կողմից կատարվող գործողությունների սահմանափակումներ
Փոքրահասակների փոխարեն գործարքները, բացառությամբ օրենսդրությամբ սահմանված դեպքերի, նրանց անունից կարող են կնքել միայն նրանց ծնողները, որդեգրողները կամ խնամակալները: Ահա մի քանի բացառություն՝
Փոքրահասակներն իրավունք ունեն ինքնուրույն կատարելու`
1) մանր կենցաղային գործարքներ
2) անհատույց օգուտներ ստանալուն ուղղված և նոտարական վավերացում չպահանջող գործարքներ
3) որոշակի նպատակով կամ ազատ տնօրինման համար խնամակալի կողմից կամ նրա հանձնարարությամբ իրենց հանձնված միջոցների տնօրինման գործարքներ
Անչափահասները կարող են գործարքներ կնքել իրենց օրինական ներկայացուցիչների` ծնողների, որդեգրողների կամ հոգաբարձուի գրավոր համաձայնությամբ` բացառությամբ օրենսդրությամբ նշված գործարքների: Բացառությունները հետևյալն են՝
Անչափահասները, առանց ծնողների, որդեգրողների կամ հոգաբարձուի համաձայնության, իրավունք ունեն`
1) տնօրինելու իրենց աշխատավարձը, կրթաթոշակը և այլ եկամուտները
2) իրականացնելու գիտության, գրականության կամ արվեստի ստեղծագործության, գյուտի կամ մտավոր գործունեության` օրենքով պահպանվող այլ արդյունքի հեղինակի իրավունքներ
3) ավանդներ մուծելու վարկային հաստատություններ և տնօրինելու դրանք
4) կնքելու կենցաղային մանր և այնպիսի գործարքներ, որոնք փոքրահասակներին ինքնուրույնաբար կնքել չի արգելվում:
Ի դեմ, փոխանցումների բոլոր տեսակները և MyAmeria հավելվածի իրավասությունները նույնն են բոլոր հաճախորդների համար, սակայն բանկում գործում են ծառայություններ, որոնցից կարող են օգտվել միայն չափահաս անձինք, ինչպես, օրինակ, վարկերը կամ պահատուփերը։
Արիˊ ամփոփենք
Երեխաներին բանկային ոլորտին վաղաժամ ծանոթացնելը բազմաթիվ առավելություններ ունի, այդ թվում՝ ֆինանսական գրագիտության սերմանում, խնայողությունների խրախուսում, միջոցների անվտանգության ապահովում։
Եթե ստացար քո բոլոր հարցերի պատասխանները, շտապի՛ր բացել բանկային հաշիվ ու քարտ և քո երեխայի հետ անել ֆինանսական անկախության առաջին քայլերը։