«Սկզբում դու աշխատում ես անվան վրա, իսկ հետո անունն է աշխատում քեզ համար»:

Բիզնես սկսելու կարևոր քայլերից մեկը բրենդինգն է, առաջնայինը`   նեյմինգը`   այն անունը, որով ապրանքը կամ ծառայությունը հանդես է գալու շուկայում:
Ձեռնարկատիրական գործունեություն իրականացնելու նպատակով ընկերություն գրանցելիս կազմակերպությունը պետք է 2 տիպի անուն մշակի:
Անվանումներից մեկը գրանցվող ընկերության անվանումն է, այլ կերպ`  իրավաբանական անձի անվանումը, իսկ մյուսը`  այդ ընկերության ֆիրմային անվանումը`  պայմանավորված ապրանքի կամ ծառայության բովանդակությամբ:

Իրավաբանական անձի անվանումը և նրա ֆիրմային անվանումը կարող են լինել նույնը:
Շատ ցանկալի է, որ ՍՊԸ-ի և իր բիզնեսի անվանումները նույնը լինեն, որպեսզի ընկերությունը խուսափի տարատեսակ շփոթմունքներից: Բացի այդ, ժամանակի ընթացքում ընկերությունը կարող է ընդլայնել իր գործունեության շրջանակը, հետևաբար պետք է ընտրել այնպիսի անվանում, որը հետագայում համապատասխանի գործունեությանը:
Սակայն շատ հաճախ անձը ընկերությունը գրանցում է, օրինակ, իր անուն ազգանունով, իսկ ֆիրմային տալիս է այլ անվանում:

Հետաքրքիր անուն ունենալը գործի կեսն է: Պակաս կարևոր չէ անվան իրավաբանական գրանցումը: Հետաքրիր, ստեղծագործ անուն որոշելու ընթացքում պետք է կատարել ստուգում`  արդյոք անվանումն ազա՞տ է օգտագործման համար, թե՞ նրա օգտագործման իրավաբանական իրավունքները պատկանում են այլ ընկերության:

Իսկ ինչպե՞ս ընտրել իրավաբանական անձի և ֆիրմային անուններ:

Բացի այն, որ անվանումը պիտի լինի հեշտ գրվող և արտասանվող, ունիվերսալ, դրական հույզեր արթնացնող, այն նաև իրավական տեսանկյունից պետք է լինի օրենսդրական կարգավորումներին համապատասխանող:

Ասոցիատիվ

Անվանումը պետք է բխի արտադրանքի կամ ծառայության բովանդակությունից և պարունակի առնվազն 1 տարբերակող անուն`  հատուկ, հասարակ, հորինված կամ տառերի կապակցությամբ:

Թարգմանական

Ֆիրմային անվան հետ կարող են օգտագործվել նաև դրա օտարալեզու թարգմանությունները:

Հիմնադիրների անուններ

Անվան մեջ կարելի է օգտագործել հիմնադիրների անունները, որոնք բարեհունչ են, հիշվող և եզակի:

Հորինված բառեր

Կարելի է օգտագործել երևակայությունն ու ստեղծել օրիգինալ տարբերակներ: